DUHA ka Romanian national nga sakop sa dakong sindikato sa ATM Skimmers ang nasikop sa mga sakop Criminal Investigation and Detection Group inabagan sa mga sakop sa City Intelligence Branch sa Mandaue City Police Office pasado alas 7 niadtong Sabado sa gabii sa barangay Tipolo, dakbayan sa Mandaue.
Ang mga suspek naaktohan sa mga police nga nag-withdraw og kuwarta gamit ang mga peke nga ATM cards.
Ang mga nasikop giila nga silang Petru Ion Uveges, 43 anyos, kasamtangan nga nanimuyo sa Lot 5 Belle Helena Town Clarkview, Angeles City, Pampanga ug Stefania Michaela Osman, 36 anyos, pulos Romanian national nga taga Drobeta-Turnu Severin, MH.
Matud ni P/Supt Marlon Tayaba, hepe sa CIDG-7, nga kapin sa usa ka bulan nilang gipanid-an ang illegal nga trabaho sa maong langyaw human mireklamo ang usa ka bangko labot sa dinagko nga withrawal gamit ang mga British Export Cards nga maoy nagsilbing ATM card.
Kasagaran hinuon sa ilang nabiktima gikan sa gawas sa nasud diin ilang i-hack ang mga bank account sa mga langaw ug himo-an nila og mga ATM cards gamit ang ilang mga makina ug sayon nalang alang kanila ang pag withdraw sa kwarta.
Usa sa mga bangko nga wala lang nganli ni Col Tayaba ang unang mireklamo sa ilang buhatan tungod sa kadagko sa ilang gi withdraw.
Giingong matag adlaw maka kuha ang grupo ni Uveges ug kapin sa tunga sa milyon ka pesos.
Tungod niini naalarma na ang maong bangko nga maoy hinungdan nga nagpatabang sila sa CIDG-7.
Matag transaction sa mga suspek moabot ug tag kapin sa P50,000 nga sobra na sa limit sa mga bangko.
Sama niadtong laing langyaw nga nasikop sa CCPO nga migamit usab ug reward cards sa 7-Eleven nga i-clone ang ATM card sa usa ka biktima ug i-hack usab ang account number niini aron makakuha na sa kwarta nga iyang gideposito.
Nakuha sa posisyon niining duha ka dinakpan mao ang usa ka Toyota innova nga dunay plate number nga (ZAB 486), duha ka pitaka, duha ka cellphone, 67 ka British Exports Cards nga maoy gihimong ATM cards sa pagkuha sa kwarta, Metro Bank card, LTO license nga gipanag-iya ni Uveges, Metro Reward cards nga nakapangan ni Stefania Michaela.
Aduna usay mahalong bag ug kwarta nga mobalor ug P52,000. Giangkon ni Col Tayaba nga dinhi napilian sa mga sindikato sa ATM skimmers sanglit ang mga ATM cards dinhi dali lang himuon dili susama sa ubang nasud nga migamit na sila ug mga micro chips nga lisud kopyahon sa mga iligalista.
Kasong kalapasan sa Republic Act 8484 kun Access Device Regulation Act of 1998. Gawas sa duha nga ilang nadakpan duna pa kini laing mga kauban nga wa na nila maabti pa atol sa gihimong police operations.
Tungod niini nagtuo ang CIDG-7 nga duna pay laing mga kauban ang mga dinakpan nga naghimo ug illegal dinhi sa Sugbo nga hugot karon nilang gi monitor uban sa mga bangko.