GISUGDAN na ang hugot nga seguridad nga gipatuman sa kapolisan diha sa mga bus terminal sa weste ug este nga bahin sa siyudad sa Cagayan de Oro.
Sa Agora Integrated Bus Terminal diin sagad nga modagsa ang katawhan paingon sa nagkalain-laing probinsya ang gitutokan na sa kapolisan.
Si Police Senior Inspector Enesto Daing, kinsa deputy station commander sa Police Station 3 (PS3) sa Agora, miingon nga hugot nga nakadeploy na ang mga personahe sa PS3 sa area sa terminal.
Gibutyag niini nga aduna silay gibutang nga police assistance desk nga modawat sa mga reklamo sa mga pasahero ug mahimo nga motaho kanila kung adunay mga dili malikayan nga mga insidente.
Gibutyag niini nga sila mismo ang kapolisan maoy mosusi sa mga bagahe nga isakay paingon sa bus ug gihangyo lamang niini ang katawhan nga kung mahimo dili na kayo modala og mga dagkong bagahe aron usab dili sila malangan labina nga magpunsisok na sa kadaghan ang mga pasahero.
Hinuon, gibutyag niini nga kagahapon, adlawng Lunes, dili pa ingon kadagsa ang mga pasahero ug sagad sa mga nanguli mga tinun-an pa lamang labina human naman ang graduation season niaging semana.
Gilauman nga modaghan ang pasahero sa adlawng Miyerkules ug Huwebes tungod kay katapusan na kini sa trabaho sa pribado ug gobyerno.
Dili lamang naka uniporme ang mobantay sa palibot sa terminal apan aduna usab nakasibilyan nga mga polis nga magmatikod batok sa nagmatikod usab nga mga dautang elemento.
Niaging semana, gisusi na sa mga personahe sa Land Traportation Office ug Land Tranportation and Franchising Laboratory Board ang mga bus kon insakto ba ang ilang kondisyon aron luwas ang mga pasahero paingon sa ilang mga destinasyon.