ANG Holy Cross of Davao College (HCDC) Crusaders ug Agro Industrial Foundation College of the Philippines (AIFCP) Sailors mag-ilog sa titulo sa Philippine Collegiate Champions League (PCCL) Escandor Cup 2017 sa Lunes, Oktubre 30, didto sa Davao City Recreation Center.
Ang modaug maoy mopresenta sa rehiyon sa Davao ngadto sa PCCL Mindanao Finals sa Nobyembre 23 hangtud 26 sa Davao City.
Ubos ni Coach Isaias Gravador sa Crusaders misibog sa finals human gilampaso ang Ateneo de Davao University (Addu) Blue Knights, 100-67, niadtong Martes.
Bisan ang Crusaders misulod sa finals nga way pildi, gikonsidera gihapon ni Gravador nga sila "underdogs."
"We will just exert extra effort in rebounding and sustain our pressing defense," ni Gravador.
Dugang niya, "Hindi namin sila hahayaan na maipasok ang bola sa baseline because it would be a game over for us."
Samtang ang Sailors, giugsok ang STI College, 100-37, aron makalaban ang Carusaders sa kampeyonato kinsa mipildi kanila og upat ka puntos sa eliminasyon.
Bahin ni AIFCP head coach Ondo Conda, sa laing interbyu, nga sulayan nilang mabuak ang depensa sa HCDC ug magpabilin sa sistema nga ilang ginahimo sa pagbansay.
"Dili man mi behind sa players kay makasabay-sabay man sila sa Holy Cross. Ang amoa lang maka-prepare lang mi sa ilahang defense kay the last time na nag-champion mi sa PCCL kay around 2011 pa yata," pahayag ni Conda.