ANDAM na ang Davao City Transport and Traffic Management Office (CTTMO) sa pagpatunhay sa dagan sa trapiko karong Kalag-kalag.
Kini ang gibutyag ni Dionesio Abude, hepe sa CTTMO, diin bisan usa sa mga personahe sa maong buhatan ang wala una gitugtan nga mo leave aron matabangan ang paggiya sa mga motorista sa mga kadalanan.
"Expected man gyud nga mas mo-traffic pa gyud maong bisan usa nila wala una nato gipa-leave, ug andam nata alang sa Kalag-Kalag," sulti ni Abude atol sa AFP-PNP Press Conference kagahapon.
Sumala ni Abude nga ila gihapong dakpon ang mga motorista nga mopataka og parking ug moagi sa mga wrong way.
Karong semanaha gipangmuntar na sa CTTMO ang mga traffic signages ug mga road signs sa mga re-routing areas sa mga kalsada duol sa mga sementeryo sa dakbayan.
Segun ni Abude nga nangayo na sila og tabang sa Traffic Community Network (Trafcon) nga maoy magsilbing force multipliers sa mga traffic enforcers.
Gipagula na sab sa CTTMO ang mga traffic schemes ug ang scheme sa matigayong re-routing sa Nobyembre 1 ug 2 sa mga dapit nga duol sa mga sam-ang ning dakbayan.
Nagpahimangno ang opisyal nga kung mamahimo, di nalang magdala og sakyanan aron di malangan ug aron di na makadugang sa kaguot sa trapiko nianang mga adlawa. (JPC)