LIBO ka libong mga Sugbuanon ang niagwanta sa naglagiting nga kainit sa adlaw kagahapon sa buntag aron moapil sa funeral procession sa nitaliwan nga Cebu Archbishop Emeritus Cardinal Ricardo Vidal.
Ang kainit sa adlaw ug ang gibag-on sa duot sa katawhan nga nisalmot sa funeral procession nagpakita sa kainit sa pagbati yg pagmagal sa mga Sugbuanon ngadto sa cardinal nga gitunod sa iyang katapusang pahulayan sa mausoleo luyo sa Cebu Metropolitan Cathedral sa alas 11:30 sa buntag kagahapon.
Ang funeral procession nagsugod sa alas 10 sa buntag human sa requiem mass nga gisaulog ni Cebu Archbishop Jose Palma uban sa tulo ka nahibiling buhi nga mga Pilipinong cardinal, sila si Manila Archbishop Cardinal Luis Antonio Tagle, Cotabato Archbishop Cardinal Orlando Quevedo ug Manila Archbishop Emeritus Cardinal Gaudencio Rosales.
u25cf ● ●
Si Cardinal Vidal naila sa iyang pagkamapahiubsanon ug tumang kaligdong. Gitawag siya nga usa ka peacemaker, di tungod sa iyang pacemaker, kon di tungod kay gusto siyag kalinaw.
Daghang mga panagbingkil nga iyang nahilot, lakip na ang hapit moulbo nga gubat tali sa kasundalohan nga loyal sa kagamhan ug niadtong nagkudeta.
Mao tingali nga bisan sa wa pa siya malubong, duna nay nisugyot nga angay siyang masantos.
u25cf ● ●
Si Kongresista Raul del Mar sa Cebu City north district niadtong miaging Lunes niawhag sa mga pangulo sa Simbahang Katoliko sa pagpasiugda sa canonization ni Cardinal Ricardo Vidal.
Kinsay nagdahom nga si Cardinal Vidal, nga nangusog alang sa canonization ni San Pedro Calungsod, mahimo usab nga usa ka santos?
Duha pa lang ang mga santos sa Pilipinas, sila si San Lorenzo Ruiz ug San Pedro Calungsod. Makapaabot kita nga ikatulo si San Ricardo Vidal.
u25cf ● ●
Matod pa ni Kongresista Del Mar, angayan nga masantos ang cardinal.
“He deeply believed in prayer. Many people talked about his humility. I was a witness to that. He was not self-absorbed,” matod pa niya.
“Cardinal Vidal was a gift to Cebu and the Cebuanos. How heart-warming this awesome gift was,” nagkanayon ang kongresista.