ANDAM si Pres. Rodrigo Duterte magpakamatay tungod sa iyang gugma sa nasod samtang si US Pres. Donald Trump andam nga mahimong sapian ang matag Amerikano. Taas og rating si Duterte kay natagbaw ang mga Pilipino sa iyang paghawan batok sa ginadiling drugas. Nag-una sa survey sa Time Magazine sa “100 Most Influential People” sa tibuok kalibotan. Kang Trump 40 porsento ra ang trust rating kamatuoran nga sa unang adlaw gisugat og halapad nga protesta nga Women’s Marches nga gisalmotan sa 3.5 M kay wala mauyoni ang agenda paghulip sa Obama Health Care, dili ganahan sa mga Black Americans, hinginlan ang Fil-Ams nga walay klarong papeles, sobra sa 300,000 ka Pinoy nga illegal immigrants ang papaulion, ginganlan ang mga Pilipino nga terrorists ug animals gumikan usab sa presensya sa mga teroristang Muslim. Samag estilo sila si Duterte ug Trump. Parihas nga himalikas. Apan lahi og pagbati sa natad sa pangalagad. Lakang ni Trump pagwagtang sa mga call centers sa Pilipinas adto na ibalik sa US, pinikito na ang pagdawat sa mga export products. Hinoon samag estilo nga nakig-amigo sa karibal nga nasod ngadto ni Russian Pres. Vladimir Putin. Russian delegations mianhi sa Pilipinas aron pagbobo og pohonan samtang misalga si Putin sa computer hacking sa email hinungdan sa pagkalukapa ni Hilary Clinton. Giamigo usab ang China nga mihatag nag hinabang ug mga proyekto.
Dili ikahibulong nga mga kaatbang ni Trump moguba sa iyang liderato mao sab kang Duterte morag wating naputol sigig limbag pagpangitag buslot ang mga kaaway sa politika. Pangataki sa oposisyon ngadto sa administrasyon ilabina sa extrajudicial killings pagpatay nila ni Albuera Mayor Rolando Espinosa sulod sa prisohan sa Baybay, Leyte; Koreanong negosyante Jee Ick Joo sa Camp Crame human sa kidnap o tukhang-for-ransom, pagpangilkil sa langyawng magpapatigayon Jack Lam ug napatay nga mga minor de edad. Laing nagbuling-buling sa han-ay sa PNP mao ang pagdawat og suborno isip drug protector, pagpatay aron dili makatug-an nga sila protector, pagpapirma nga mga drug surrenderers bisan dinakpan sa laing krimen aron makuha ang quota ug uban pang matang sa pangabuso.
Gikatakda nga sa Nobiyembre moanhi sa nasod si Trump alang sa bilateral talks nunot sa Asean summit dinhi sa Pilipinas ug Apec summit sa Japan. Kini nagtataw sa panag-uli sa maayong relasyon tali sa Pilipinas ug US. Miaslom ang diplomatikanhong relasyon sa duha ka nasod kay dili managsama ang pagbati ug estilo ni Duterte ug kanhi US Pres. Barack Obama.
(csa_1156@yahoo.com/0916-734- 5737)