DAGSAON na pod og mga tawo, di lang mga sementeryo ug simbahan, kon di apil na sab ang mga terminal sa bus, pantalan ug tugpahanan atol ning kasaulogan sa kalag-kalag sa sunod semana.
Segurado kita nga di magpaulahi ang atong mga kaigsuonan, ilabi na gyud kadtong magtutuong Katoliko, nga mopauli sa ilang mga probinsiya o lugar aron didto magsaulog sa adlaw sa minatay.
Dinhi lang sa siyudad sa Davao dunay 50 ka mga sementeryong pampubliko ug pribado nga gilaumang dugokan unya sa dakong duot sa katawhan.
Apan sayud kita nga kon asa kadtong daghang mga tawo, didto sab magpahimulos ang mga dautang elemento samtang linga ang mga tawo sa pagsakay sa biyahe padulong sa ilang mga dapit. Mao pod ang senaryo sa mga sementeryo.
Busa ang mga tinugyanan sa balaod dunay mga pahimangno ug sumbanan nga ipatuman aron nga mapabilin ang kahapsay ug kalinaw sa mga sementeryo.
Gani, gibana-bana nga dunay ipakatap nga kapin 5 mil ka mga pulis ug uban pang yunit sa kasundalohan sa nagkadaiyang dapit sa siyudad aron nga kabantayan ang publiko.
Ang paglampus sa kasaulogan sa kasaulogan mag-agad sab kanatong mga molupyo pinaagi sa pagsunod sa gilatid nga mga sumbanan sa mga awtoridad, ilabi na gyud sa mga butang nga gidili sa mga sementeryo sama sa pagdala og mga mahait nga mga butang, lighter, mga ilimnong makahubog, mga sonata ug uban pa aron nga di kita makatugaw sa mga nanag-ampo.
Gawas pa alang man kini sa atong proteksiyon ug kaayohan.