SI Board Member Celestino “Tining” Martinez III niawhag sa Department of Public Works and Highways (DPWH) sa pagbutang og early warning devices sa mga proyekto sa karsada aron malikayan ang aksidente.
Matod ni Martinez nga sagad sa mga aksidente nahitabo sa lawom nang gabii busa ilang subling gipahinumdoman ang DPWH ug sa mga kontraktor sa pagsunod sa balaud nga nagsagop alang sa paghimog mga lakang sa seguridad sa mga proyekto.
Si Martinez niingon nga ang DPWH mao ang hingtungdan nga ahensya kay ang mga aksidente nahitabo sa national nga mga karsada nga gipang-ayo ug gipangmintinar.
Nagplano ang Provincial Board nga ipatawag ang DPWH ug mga kontraktor niini aron mopasabot nganong way early warning devices sa mga proyekto labina sa gabii.
“If DPWH and its contractors don’t put early warning devices on projects, the safety of the motorists and the riding public will be in danger,” nagkanayon si Martinez.
Niadtong hinapos sa Agusto, dunay mga nangreklamo batok sa Department of Public Works and Highway (DPWH) ngadto sa Hunta Probinsiyal.
Kini nunot sa kakuwang og mga early warning device sa ilang road widening project sa Brgy. Pitalo, lungsod sa San Fernando sa habagatang Sugbo ug bisan sa ubang mga dapit sa probinsiya. (EOB, dugang taho ni REV)