‘Hitman’ nadakpan

GIINGONG gun-for-hire ug drug pusher kinsa aduna’y na­ka-ung-ong nga kaso na­si­kop sa Mobile Patrol Group kagahapon sa South Road Pro­perties, dakbayan sa Sugbo.

Si Freddie Bart Fulache, 30, residente sa Sitio Silangan, Brgy. Tejero, dakbayan Sugbo, naatlan sa MPG nga nagub-an sa iyang sakyanan sa may Ludo building sa SRP, pasado alas 9:00 sa buntag kagahapon.

Sakay si Fulache sa iyang gi­maneho nga Nissan March (YJO 747).

Matod sa nag-aresto niini nga si PO2 Alvin Estopa, nga samtang nag-roving sila, ilang naabtan nga naka-hazard si Fulache tunga sa dalan dihang ilahang naabtan.

Dihang ilahang girespondehan, gipangayoan kini nila og driver’s license apan wala makapakita ug expired ang rehistro sa sakyanan niini.

Ila kining gikapkapan ug naku­ha sa hawak niini ang usa ka armas nga kalibre .45 nga pistola.

Gawas niini, laing tulo ka mga armas ang nakuha sa bag sulod sa sakyanan niini, lakip ang .357 caliber revolver, KG-9 submachine pistol, Uzi submachine pistol ug nagkadaiyang mga bala.

Drugas nga nagkantidad og P15,000, kwarta, drug paraphernalia ug notebook nga aduna’y lista sa mga transaksyon niini sa ilegal nga drugas lakip usab sa nasakmit.

Ang transaction nagsugod ni­adtong Agusto samtang ang ka­tapusan niadtong Septiyembre.

Nanghimakak si Fulache nga iya ang mga armas ug drugas.

Matod ni Estopa nga nakiglambigit sila sa Waterfront Police Station diin giingon nga nakapatay ang suspek niadtong Hulyo.

Si City Intelligence Branch head sa Cebu City Police Office, Chief Insp. Christopher Navida nikompirmar nga makatulo na ka mga higayon nga napriso si Fulache.

“I don’t anything about that,” Fulache said.

Matod ni Navida nga sa ilang records, si Fulache napriso sa Cebu City Jail, New Bilibid Prisons sa Muntinlupa City ug Iwahig Prison and Penal Farm sa Puerto Prinsesa, Palawan.

“First he was caught for the violation of RA 9165 for drugs, then RA 10591 for illegal possession of firearms and recently for frustrated parricide after he tried to kill his own mother,” nagkanayon si Navida.

Lakip sa mga kaso mao ang kalambigitan sa illegal nga drugas, frustrated parricide ug RA 10591 o illegal posse­ssion of firearms.

Pasakaan og kasong kalapasan sa Republic Act 10591 tu­ngod sa mga armas nga nasakmit ug Sec. 11 ug 12 sa RA 9165 kun Comprehensive Dangerous Drugs Act of 2002.