ANG Dabawenyo nga si Rowelyn Joy Acedo mitapos sa iyang duwa isip kauban sa De La Salle University (DLSU) women's varsity chess team pinaagi sa pagsungkit og duha ka bulawang medalya sa bag-ohay nahuman nga 2017 National University Games (Uni-Games) chess competition didto sa Dumaguete City Convention Center.
Ang DLSU maoy mikampeyon sa team competition samtang ang Jose Maria College of Davao City nabutang sa ikaduhang puwesto.
Ang Holy Angel University mao say nakakuha sa bronze medalya.
Midaug sab si Acedo sa board 4 gold samtang ang teammate nga si Ella Grace Moulic nga taga-Davao sab mibulsa sa board 3 gold.
Sila DLSU's woman international master (IM) Bernadette Galas ug Mira Mirano maoy nakakuha sa boards 1 ug 2 golds, sa maong han-ay.
"As always, proud kaayo ko na i-represent ang DLSU and for the last time nakuha napud namo ang championship," pahayag ni sa Facebook interview sa Sun.Star Davao.
Apan giangkon niya nga ang field di kaayo kusog tandi kaniadto.
"Though dili ana kakusog ang field karon pero proud and happy ko sa among performance kay nakita pod nako sa akong mga teammates na ready na sila for Uaap," sulti niya.
Sa men's division, ang Jose Maria College maoy mihari batok STI West Negros University, Holy Angel University ug St. Louis University-Baguio kinsa misunod sa tulo ka puwesto.
Mga pambato sa JMC mao sila Hareve James Sumatra, Rafael dela Torre, Bhing Joel Gimony ug Raymart Silao. (MLSA)