GIHIKAY na sa kapulisan ang kasong murder nga ipasaka batok sa usa ka 26-anyos nga giingong miyembro sa gang nga nakapatay sa Calinan, Davao City.
Alas 6:55 sa gabii niadtong Miyerkules nasikop sa Calinan Police Station ang usa ka Sadam Pulalon Taraji, 26, nagpuyo sa Purok 3, Barangay Tamayong, Calinan District ning siyudad.
Sumala ni Chief Inspector Michael Uyanguren, hepe sa Calinan Police Station, nga sud lamang sa 20-oras ilang nasikop ang suspek sa pagdunggab patay kang Jovany Quiao Mante, 23.
"Siya ang nagdunggab patay kang Jovany atol atong pagresponde sa atong mobile 97 diin napusilan sab sa pulis ang usa ka Jomar Mante," ingon ni Uyanguren.
Una niini, miresponde ang kapulisan gumikan dunay report nga natigayong riot sa Magsaysay Street alas 9:15 sa gabii niadtong Martes.
Pag-abot sa mobile patrol sa dapit inay mahadlok ang mga nag-riot sa miabot nga pulis apan lima ka mga lalaki ang mi-atake sa pulis pinaagi sa pagkulata hinungdan nga napugos ang pulis nga mobunlot sa iyang armas ug gipusil ang usa, kinsa mao si Jomar nga miapil sab og kulata sa pulis.
"Si Jovany, wala may igo sa pusil, dinunggaban hinuon kinsa maoy napatay ni Sadam, kay nagrambol naman sila," dugang ni Uyanguren.
Ning kasamtangan, balhog ang suspek sa Calinan PNP samtang nasayran nga di na mopasaka og reklamo batok pulis ang ginikanan sa napusilan.