Mayor Apura Cup sugdan Nob. 4

ANDAM na ang tanan alang sa pagpahigayon sa Carcar City Mayor Nice Apura Cup Inter-Commerical Open basketball tournament nga sugdan karong Nobiyembre 4 sa Carcar City Sports Complex.

Upat ka teams ang magtigi sa kompetisyon nga magdalit og P110,000 nga kinatibuk-ang ganti.

Magsangka sa walo ka mga adlaw nga torneyo mao ang SG/ARQ Builders, Team City of Bogo, Aspa Scaffoldings, ug Sherilin Plastics.

“Akong gi-invite ang atong mga Carcaranons nga motan­-aw aning much awaited event sa atong siyudad. Usa ni sa mga kalihukan sa umaabot natong piyesta sa Carcar,” matod ni Carcar Mayor Nice Apura kagahapon sa usa ka press confe­rence sa Rafael’s Sports Bar sa SM Seaside.

Ang torneyo mosubay sa single-round robin elimination unya human niini, angt top two teams mao magsangka alang sa knockout championship game samtang ang mahabilin nga duha mag-ilog sa ikatulong luna.

Ang kampiyon makadawat og P50,000, makabulsa og P30,000 ang 2nd pla­cer, P20,000 sa 3rd placer ug P10,000 sa 4th placer.

Sa premirong adlaw sa torneyo, unang magsangka ang City of Bogo batok SG-ARQ Builders sa alas 7:00 ang takna sa gabii samtang mosunod ang engkuwentro sa Shrilin Plastics batok Aspa Scaffoldings.

Ang teams tugotan nga makailis og player matag duwa basta dili lang kini gikan sa laing partisipanteng team. Gidili ang pagkuha og langyaw nga import. Ang torneyo ti­pik sa inisyatiba ni Cebu First District Rep. Gerald Anthony ‘Samsam’ V. Gullas, Jr. nga himuong aktibo ang basketball commercial tournaments dili lang sa iyang distrito kon dili sa tibuok sa Sugbo. Gawas sa basketball, ang Carcar City mopahigayon sab og mga torneyo sa volleyball, lawn tennis, ug motocross. (ESL)