Duha ang patay sa duha ka managlahing mga pagpamusil sud sa upat ka oras nga gintang sa dakbayan sa Sugbo.
Unang biktima mao si Junny Cortes, hingkod, taga Barangay San Isidro, dakbayan sa Talisay apan lumad nga taga lalawigan sa Masbate, kinsa gipusil-patay sa wa mailhing mamumuno sa Gen. Maxilom Ave., alas 11:55 sa gabii sa Martes, Agusto 2, 2022.
Si Police Senior Master Sergeant Jephta Jumawan sa Abellana Police Station sa Cebu City Police Office (CCPO), nibutyag sa Superbalita Cebu nga ang biktima nag-escort og mga langyaw nga mosuroy sa dakbayan labi na sa paglingawlingaw sa gabii.
Sumala sa saksi, duha ka mga tawo nga nagmotorsiklo, usa niini maoy niduol ug nipusil sa biktima dayong sibat sakay sa motorsiklo.
Atol sa pagkuha ning kasayoran, blangko ang Abellana Police Station bahin sa motibo sa pagpatay, apan unang gisubay sa kapulisan ang personal nga bangi.
Usa ka Danny (dili tinuod ngalan) nga duol sa nahitaboan nibutyag nga ang biktima nailhan sa dapit sa angga nga “Cortes.”
Niadtong tungora, sumala sa saksi, ang biktima niduol kaniya ug nipalit sa iyang baligya nga pagkaon ug nilakaw.
Dugang ni Danny, nakadungog na lang siya og duha ka mga buto sa armas ug wala siya nakakita sa mamumuno tungod sa iyang pagtago sa kahadlok.
Dugang niya, si Cortes kanunay mag-istambay matag gabii sa lugar tungod kay ang asawa niini naa nagtrabaho sa usa ka balay-kalingawan nga duol sa nahitaboan apan, dason ni Danny, wala siya nakaila sa babaye.
Samtang, pagka alas 3:15 sa kaadlawon sa Miyerkules, Agusto 3, 2022, laing pagpamusil ang nahitabo sa Sityo Kauswagan, Barangay Basak Pardo.
Ang chief investigator sa Pardo Police Station, Police Senior Master Sergeant Geoffrey Gutual, niila sa biktima nga si Randy Flores Delos Santos, 34, lumolupyo sa lugar.
Matud ni Gutual nga ilang gidudahan nga mamumuno ni Delos Santos mao usab ang suspek sa pagpusil-patay sa iyang igsuon nga si Junril niadtong Lunes, Agusto 1, 2022, kinsa dead on arrival (DOA) sa tambalanan.
Samtang, si Randy naabtan og pipila ka oras una nakabsan sa iyang kinabuhi sud sa ospital.
Personal nga anggulo ug drugas ang gitan-aw nga posibling mga motibo sa pagpatay sa duha ka mga managsuon sulod ning semanaha.