Nitakda ang Bangko Sentral ng Pilipinas (BSP) og bag-ong deadline alang sa mga magpailis o magpabaylo sa ilang New Design Series banknotes ngadto sa New Generation Currency (NGC).
Sa website, ang BSP nipahibawo nga hangtod sa Disyembre 29, 2017 gitugot ang pagpabaylo ug pagpailis sa daang mga kwarta de papel ngadto sa bag-o.
Gihimo kini isip tubag sa daghang hangyo sa publiko.
Way bayad sa maong transaksyon sa BSP Cash Department, regional offices ug mga sanga sa tibuok nasod.
Ang BSP niklaro nga hangtod lang sa P100,000 sa matag transaksyon ang ilisan nga karaang kwarta de papel.
“NDS exchange for larger amounts may be allowed but payable only by check or direct credit to a bank account,” tipik sa pahibawo niini nga nigawas sa iyang website niadtong Biyernes.
Makadaghang higayon na gilugwayan sa BSP ang pagdawat sa NDS banknotes nga gilusad niadtong 1985.
Una gitakda ang deadline niadtong Disyembre 31, 2016, apan gilugwayan hangtod sa Marso 31, 2017.
Ug tungod sa daghang hangyo sa publiko, gisibog na usab kini ngadto sa Hunyo 30 ning tuiga.
Niadtong Disyembre 16, 2010, giisyu sa BSP ang bag-ong kwarta de papel.
Human sa tagal, mawala nay kantidad ang daan nga mga kwarta nga papel nga dili mailisan sa BSP ug sa mga banko.
Dili na kini mahimo magamit sa pagpalit og produkto ug pagkaon, pagbayad sa mga serbisyo, pagplite sa mga publikong sakyanan ug ubang bayranan nga magkinahanglan og kwarta.
Ubos sa Republic Act 7653 kun Central Bank Act of 1993, ang BSP dunay mandato nga ilisan ang daan nga salapi nga sobra na sa lima ka tuig alang sa kwarta de papel ug sobra sa napu ka tuig alang sa mga sinsiyo.