MALITA, Davao Occidental -- Gipasalamatan sa kagamhanan ang tanang sakop sa 73rd Infantry Battalion (IB) ug Davao Occidental Police Provincial Office (DOCPPO) apil ang Provincial Public Safety Battalion (PPSB) sa malampuson ug malinawong pagtak-op sa lima ka adlaw nga selebrasyon sa
2nd Araw ng Davao Occidental.
Gipaabot ni Davao Occidental Governor Claude Bautista ang iyang pasalamat ngadto kang provincial police director Senior Superintendent Thor Cuyos ug 39th IB commanding officer Lieutenant Colonel Marlon Angcao ug Chief Inspector Samson Kimayong, pamuno sa PPSB.
Matud ni Bautista nga laing kasaysayan na sab sa malampuson, hapsay ug malinawong pagsaulog ang natapos diin dakong parte sa kalinaw ang nahatag sa kapulisan ug militar.
Hugot nga seguridad ang gipatuman ilabi pa nga luwas nga miabot ug nakauli ang mga giimbitang artista gikan sa kauluhang Manila.
Nagbaha ang mga iladong artista sa lugar diin ang uban kanila nahimong hurado sa gipahigayong Reina de Davao Occidental niadtong Huwebes sa gabii.
Pipila ka mga iladong personalidad ang miabot sa lugar sama nila ni Andrew E., Kyle Velino, Alice Dixon, Vin Abrenica, Bamboo, John Medina, Bella Padilla ug Jona Soquite ang mihatag paglingaw sa katawhan.
Samtang, gibutyag sa gobernador nga dili lamang silang mga opisyal ang makahatag og kalambuan sa probinsya kundi gikinahanglan ang panagahiusa apil sa mga molupyo sa barangay aron paspas nga makabarog ang batan-ong lalawigan.
Sumala ni Bautista nga buot na nilang masugdan sa sunod tuig ang mga modernong pasilidad ug makabaton na sab og sports complex nga mahimong modawat sa mga atleta gikan sa mga nasud sa Asya.
Daghang mamumuhunan na ang misulod sa lugar ug nagpadayag nga andam silang mobubo og kapital sa Davao Occidental.
Samtang, si Representative Lorna Bautista-Bandigan nagbutyag nga dako ang iyang pasalamat sa lima ka mga mayores nga sakop sa probinsya tungod sa kooperasyon niini sa mga opisyal sa lalawigan.
Gipasalig ni Bandigan nga tutukan sa Kongreso ang mga nag-unang panginahanglon sa ilang mga katawhan.
Bisan si Bise-gobernador Franklin Bautista nipasalig sab nga gilantaw nilang magsuon nga moalibyo ang panginabuhian sa mga katawhan bisan sa lagyong kabarangayan aron masulbad ang kapobrehon ug kagutom sa mga kabus.
Sa uwahing datos, nag-una ang lungsod sa Malita sa pinaka-adunahang lungsod sa Davao Region ug tungod kini sa mga dagkong investors nga nagbutang og kapital sa lugar.
Sa pikas bahin, gibutyag sab ni Sarangani Mayor Virgie Cawa nga tutukan nila ang pagpalambo sa mga nag-unang tourist destination sa ilang lugar aron mas daghang langyaw ang mobisita dinhi.
Adunahan sa coral reef, flora ug fauna ug nindot nga kinaiyahan ang lalawigan mao nga usa kini sa ilang gipasigarbo nga bisitahon sa mga langyaw. (OBD)