DAKONG kalipay sa tibuok nasud kining kadaugan sa atong militar batok sa mga teroristang ISIS diha sa gubat sa Marawi ug makasugod na ang rehabilitation sa maong syudad.
Makadasig sab ang kadaghan sa nagpanikad nga motabang labi na sa mobubo og hinabang aron mabalik o mas nindot pa ang Marawi ugma puhon.
Apan makapabalaka sa mga survivor sa bagyong Yolanda kining lakang nga kuhaan og pundo gikan sa Yolanda rehabilitation ngadto sa Marawi rehabilitation.
Ayaw lang sab isakripisyo kining mga nabiktima na sa bagyo, nga nabiktima pa gyud sa pangurakot ug katanga sa mga nahitungdang opisyal. Lalim bay hangtod karon wa pa gyud mahuman ang mga housing relocation sites karong nag-angat na ang ikaupat nga tuig sumad sa Yolanda.
Ang labing ulahing balita nga akong nabalitaan mao kining baha nga niigo sa lima ka mga barangay didto sa Antique tungod sa wa mahuman nga Yolanda relocation site.
Sa sayo pa, atong nasayran nga napalgan ang mga anomaliya sa pagtukod og mga relocation site didto sa Samar. Nitumaw kini dihang nagpahigayon og imbestigasyon ang House Committee on Housing nga gipangulohan ni Kong. Albee Benitez ug Kong. Ben Evardone.
Gisundan kini og reklamo gikan sa upat ka mga Yolanda survivor sa Tacloban nga nagkanayon nga usa lang ka relocation site sa upat nga gitukod ang nahuman pa gyud. Unya wa kining klarong supply sa tubig.
Ang nakasubo kay duna man untay gitudlo si Presidente Rodrigo Duterte nga moateman niini sa miaging Nob. 8, 2016.
Apan karong hapit na sab nga Nob. 8, 2017, daw wa may eek gyud kining maong gitahasan ni Presidente Duterte nga mao ang iyang Presidential Assistant for Visayas nga si Michael Dino.
Gitumbok nga kining padayong problema sa Yolanda usa sa mga rason nganong grabi ang pag-ubos sa popularidad ni presidente sa Visayas. Ug way klarong pagpaklaro ang opisina ni Dino.
Makapahimuot ang iyang reaksyon nganong ingon niini ang kahimtang kay iya man hinuong gibasol ang mga LGU ug usa ka grupong pro-Duterte.
Ang ako na lang unta nga samtang magsugod na sab kita niining Marawi rehabilitation, di lang unta makalimtan ang mga biktima sa Yolanda.
Dayon kon unsa may pundo alang sa mga nabiktima sa Yolanda, dili na lang unta ihikaw pa kanila kay ibalhin sa rehabilitation sa Marawi.
Sinulog
Atong nasayran karon nga ubay-ubay ang mga kausaban nga ipahigayon kabahin sa Sinulog karong umaabot nga Enero 2018.
Pananglitan, giundang man tuod sa Sinulog Foundation ang fireworks, atong mapaabot nga mas bongga ang fireworks display sa tibuok syudad. Mao ni ginaingon nga abangan.
(@anol_cebu sa Twitter)