NAKAHATAG og dugang atraksiyon ang 10,000 daisies nga naglaray sa dos kilometros nga center island sa M. Patalinjug Avenue, barangay Pajo, Lapu-Lapu City nga kabahin sa tinuig nga proyekto ni Pajo Barangay Kapitan Junard Chan ang “Pasko sa Pajo”.
Niini si Mayor Paz Radaza nanghinaot nga mosunod ang ubang barangay sa pag-beautify sa ilang tagsa-tagsa ka mga dapit human nga ang barangay Basak nipahigayon sab og Christmas lighting sa center island nga nagsumpay sa Pajo.
Mi-amag ang kalsada sa mga led light nga gi-adornohan sa recycled materials nga giporma og higante nga manga ug Christmas gift lakip na ang daisies nga nagdala ‘branding colors’ sa dakbayan.
Nipasabot ang kapitan nga ang higante nga manga nagsimbolo sa barangay diin gikuha ang pangalan nga Pajo, usa ka klase sa manga.
Gitug-an ni Chan nga minus ra ang gasto sa barangay sanglit naglabi ang abag sa mga sponsor ug ang mga nagkadaiyang sektor sa ilang dapit maoy nagtinabangay sa paghimo sa dekorasyon.
“Dili namo mo-adto sa layo... kining atoa libre mong mag-selfie sa 10,000 flowers,” matod pa sa opisyal.
Sa miaging gabii si Mayor Radaza, Chan ug mga barangay officials sa Pajo maoy nangulo sa gipahigayon ang ceremonial nga pagpasiga sa Christmas lights sa center island sa M. Patalinjug Avenue ug ang maong atraksiyon matapos sa buwan sa Enero sunod tuig. (FVQ)