USA ka itom nga kandila, tulo ka itlog sa Bisaya nga manok ug bisan pila nga donasyon.
Mao kini ang gidala sa usa ka sikat nga chef sa nasod kinsa lumad nga Sugboanon dihang nagpatambal siya sa lalawigan sa Siquijor niadtong 2013.
Bisan paman sa hugot nga pagtuo niini sa labawng gamhanan apan tungod kay nakuryuso kini nisuway kini pagpatambal sa Siquijor.
“Nagkahigayon ra nga naa ko sa Siquijor way plano nga magpatambal kay nagbakasyon ra man mi, pero na interesado ko sa gi ingon nila na daghan manambal o mamarang diha dapita,” matod sa chef nga nagdumili pagpaila sa publiko.
Dugang niini nga usa kahigayon dihang nibisita sila sa iyang mga higala sa St. Francis of Assisi, nakakita siyag babaye nga nipalit og itom nga kandila nga tago nga gibaligya gawas sa simbahan, nagkantidad kini og P50.
“Nagkahiyagon ra na nakakita ko og babae na ni palit og itom na kandila sa simbahan. Na curious ko mao nangutana ko para unsa na,” midugang siya.
Ug didto siya nakisayod, hinungdan nga naila nila ang usa ka ilado nga mananambal sa Siquijor.
Martes ug Biyernes, mao kini ang mga adlaw nga maayong ipatambal, kini matod sa chef.
Pipila ka buwan bag-o siya nibisita sa Siquijor, nakasinati siya og sakit sa iyang wala nga bahin sa iyang tiyan.
Sa pag-abot palang nila sa balay sa mananambal, makahibaw na kini pinaagi sa pagtan-aw niya sa tawo kon gipadautan kini o wala.
Dihang si chef na ang gitambalan, gituan sa itom nga kandila ang unang itlog ug gisulod sa baba.
Paggawas niini nakurat sila kay pagbuak sa itlog, buhi nga baki ang naa sa sud.
“Actually ang frog gikan sa egg. Kami nag dala sa egg. After the orasyon pa tuluan nya ang egg sa kandila then i sulod sa baba. Then pag break sa egg toa na ang frog,” saysay niya.
Sa ikaduhang itlog, upat ka dagom ang nakita pagbuak sa itlog ug wala na sa ikatulo.
Dugang niini nga usa sa kauban niini pagbuak sa itlog, insekto ang nakita.
“Ang uban daw more eggs kinanglan para tangal. Ang ako kauban mga bugs pud na kuha,” nagkanayon siya.
Didto siya nakapamatuod nga ang estorya kabahin sa maong lalawigan tinuod, diin naila kini sa matang sa pagpanambal ingon man pagpabarang.
Butyag pa niini sa Superbalita Cebu nga “be careful with people,” ug “pray always.”
Wa nalang usab niya gisusi pa kinsa ang nagpadaot niya.
Si Msgr. Ruben Labajo, team moderator sa Cebu Metropolitan Cathedral nagkanayon nga di motuo ang simbahan sa barang.
Dugang niini nga usa ka "superstitious belief" ang barang ug kinahangalan nga sa Labawng Makakagagahom lang ang pagtuo.
Tambag niini nga kon adunay gipamati, moduol sa doktor ug mag-ampo sa Ginoo, sa Birheng Maria ug ni Archangel Gabriel.
Gibutyag usab niini nga kon tinuod man ang barang, usa kini ka binuhatan sa itom o sa demonyo. (HBL)