TULO ka mga tawo nga nakadawat og reward money sa kagamhanan sa Talisay City tungod sa kaso ni Jessie Largo nasikop sa Sibonga Police station tungod sa paghupot og ilegal nga armas.

Atol sa pagsikop ang mga di­nakpan miangkon ug mipasia­tab nga asset sila sa Talisay Police Station gani sila ang hinungdan nganong nasikop si Largo.

Nasayran nga pasado alas 7:00 sa buntag ang mga molupyo sa Barangay Bagakay daplin sa baybayon mitawag sa kapulisan.

Human sila nagduda nga adunay mga tawo nga sakay sa bangka ug mipakanaug sa kargang motorsiklo ug nagduda silang kinawat kini.

Niini, niabot ang mga pulis og ilang nasita ang tulo ka tawo kansang pangan gitago alang sa ilang seguridad.

Apan usa sa tulo naghupot og kalibre .45 nga armas ug adunay mga bala.

Atol sa imbestigasyon nasayran nga gikan ang tulo sa Talisay paingon unta sa lungsod sa Dalaguete sakay sa pumpboat.

Apan paghiabot sa lungsod sa Sibonga nahutdan og gasolina ang pumpboat hinungdan nga wa sila makalahos, dungan sa ilang pasiatab nga asset sila sa Talisay Police Station.

Gani ang labing uwahi nilang natabang sa kapulisan sa Talisay mao ang operation sa Talisay Police batok ni anhing Jessie Largo.

Ning insidente, ang hepe sa Sibonga nga si P/CInsp. Stephen Amamag-id daling nakig-alayon ni P/Supt. Jason Villamater.

Ang duha gibuhian tungod kay wa man kini nakuhang ebedensiya apan ang usa nga nakuhaan og armas maoy gibalhog lakip sa gikuha sa kapulisan ang motorsiklo ug ang bangka nga gigamit.

Apan si Villamater sa iyang bahin miingon nga kon nakatabang sila sa kapulisan sa Talisay wa usab kini maghatag kanilag katungod nga makadalag armas nga ilegal.

Matod niya wa na silay labot sa nadakpan ug kon pasakahan man silag kaso kinahanglan nga tubagon na kini sa dinakpan.

Si Villmater miklaro nga ang P200,000 nga reward money gikan sa kagamhanan sa Talisay alang niadtong nakatabang kanila aron matultolan ang gitagoan ni Jessie Largo, kompleto nilang nahatag.

Kini taliwa sa pamahayag sa mga tawo nga P75,000 ra ang iyang nadawat ug di P200,000.

Matod sa hepe sa Talisay City nga niadtong Biyernes nakuha nila ang reward money nga gisaad ni Mayor Eduardo Gullas nga P200,000 bugti sa pagkasikop unta ni Largo apan kay nisukol atol sa operation ila kining napatay.

Si Largo ug laing usa nga wa pa madakpi hangtod karon maoy suspek sa pagpatay sa anak sa kanhi reporter nga si John Ronli Calizar.

Matod ni Villamater nga tseke ang gitunol sa City Hall hinungdan nga Lunes pa kini nila nahatag sanglit ila paman nga gipa-in-cash.

Gani atol sa pagtunol nipirma man ang duha nga kompleto kini nilang nadawat ang kantidad.

Apan kon mao nalang kini ang iyang nakuha sanglit lima man silang nagbahin wa na silay labot pa niini.

Nagkanayon si Villamater nga sigun sa iyang nasayran nga du­ha ra sila ka tawo, apan iya nalang nga nasayran nga lima diay silang nagbahin sa kantidad.

Iyang giklaro nga sila sa kapulisan sa Talisay di na manginlabot pa kon giunsa nila pagbahin ang kwarta.

Ang mahinungdanon nga insakto nga kantidad ang ilang gihatag sanglit di siya buot nga madudahan nga P75,000 nalang ang iyang nadawat tungod kay gikuhaan sa kapulisan. (DRT)