KIDAPAWAN CITY -- Gimugna karon ang usa ka Special Task Force sa North Cotabato Police Provincial Office human gipatay ang kanhi sundalong Amerikano sa dihang gitulis didto sa Pikit.
Kini mismo ang gikompirma ni Superintendent Bernard Tayong, tigpamaba sa NCPPO.
Gawas sa kapulisan, palihukon sab ang National Bureau of Investigation (NBI) ug Criminal Investigation and Detection Group (CIDG) nga motabang sa imbestigasyon sa langyaw nga nagnegusyo.
Kahinumdoman nga gipusil patay ang biktima nga si Michael Jeff Keith, 60, minyo ug molupyo sa Cagayan de Oro City.
Kini human nga misulay og sukol sa mga suspetsado nga mitulis kaniya.
Nakuha gikan kaniya ang bag nga dunay sulod P200 mil, mga tseke ug mga personal nga kagamitan.
Nagpagawas sab og kamandoan si NCPPO director, SSupt. Jonathan Tangonan sa tanan nga mga Municipal Police Station (MPS) sa probinsiya nga magpahigayon og accounting sa tanan nga mga foreign national aron sila ma-abisuhan sa ilang seguridad.
Gimando sab ni Mayor Sumulong Sultan sa kapulisan sa Pikit nga gipamunuan ni Chief Inspector Romy Castanares nga palig-unon pa ang seguridad sa Pikit. (Edgar E. Fuerzas)