KIBLAWAN, Davao del Sur -- Namatay na ang lain pang tinun-an nga biktima sa pagpamanhig sa mga armadong grupo didto sa Barangay Kimlawis niadtong Dominggo sa gabii.
Sa progress report nga gipaguwa sa Kiblawan Municipal Police Station, nasayran nga namatay ang 16-anyos nga si Nelbert Malanson didto sa Southern Philippines Medical Center (SPMC) sa Davao City.
Laing pito pa ka mga biktima ang padayong gitambalan sa mga doktor human anaa sa talandugong kahimtang.
Kahibaloang pauli na ang Sadam truck nga gisakyan sa mga biktima gikan mitambong sa Damsu Festival sa lokal nga gobyerno dihang kalit gibanhigan sa mga armadong grupo nga nakatago mga 150-metros gikan sa dalan.
Gibutyag sa naangol nga si Jimboy Sumali nga anaa sa mga 40 ka pasahero ang sakay sa trak ug dihang duol na sila sa sentrong parte sa Kimlawis, gipamusil sila.
Nanaghap ang amahan ni Jimboy nga ang bandidong si Balansina Lingkanay ang nagpaluyo sa pagpamanhig sanglit supak kini nga magpulis ang iyang anak.
Narekober sa kapulisan ang mga basiyong bala sa Garand ug Carbine rifle nga maoy gigamit sa pagpamusil didto sa nahitaboan.
Gibutyag ni Senior Inspector Erich Vonn Requilman, hepe sa Kiblawan MPS nga padayon pa ang lawom nga imbestigasyon sa nahitabo aron mapasakaan na og kaso ang mga suspek.
“Ulan-ulan niadtong higayona unya ngitngit ang lugar dihang nahitabo ang pagpamusil," asoy ni Requilman.
Hustisya ang gipangayo karon sa mga pamilyang Malanson ug Lingkanay human namatay ang ilang mga anak. (OBD)