Dear Papa Joe,

TAWGA lang ko sa pangalan nga Remy, 40 years old, dalaga pa pero naa koy karelasyon karon. Di ko sexy ug samot nga di ko gwapa pero naa koy trabaho sa gobiyerno. Ordinary lang gud ko.

Ang akong suliran kabahin ni sa akong karelasyon karon nga sekreto lang kay masuko man akong maguwang nga mosulod ko ani kay lagi bisan guwang na ko, wala daw koy buot. Siguro magbinata na lang ko tungod sab sa akong hitsura kay nag hormonal imbalance ko mao nga tambok kaayo ko. Pero bisan ing ani ko, naay na­nguyab nako pero gatuo ko nga tinud-anay ning iyaha. Pero nagkadugay nakabantay ko nga di man gyud ni tarong iyaha nga bisan grade 1 makasabot man.

Maayo ra siya nako if naa siyay panguyuon. Maora na man hinuon og akoy nagbuhi niya kay wala man siyay trabaho. Magsige lang og basketball ug barkada. Hi­nuon gi-introduce na ko niya sa iyang mga friends pero di siya ana ka lambing nako. Mao nga feeling nako ikauwaw ko niya, labi na karon nangayo siya nako og sapatos mao nga akong gipalitan sa mall ug gi surprise. Mao na man hinuoy nasuko kay di kuno branded ang sapatos nga akong gipalit. Unsa kaha og moundang ko aning relasyon kay murag gipangwartahan ra man ko. Sakto ba?

REMY

Remy,

Dugay na ta na nimo gibiyaan kay klaro ana nga gigamit ka. Ikaw sab gigamit nimo ang imong kwarta para magpabilin siya nimo kay mao na man nay naandan niya nimo.

Kon sa pisikal lang nga aspeto imong basehan, di ka angay mabalaka kay kon ang tawo nahigugma nimo, dawaton ka niya bisan unsa ug si kinsa pa ka. Mao nga pagmata na karon samtang di pa ulahi ang tanan.

PAPA JOE

(sa inyong tampo ipadala lang sa papajoesuperb@gmail.com)