Rabacal: Kwarta sa basura

R
R

Ang Inayawan Sanitary Landfill (ISL) natukod niadtong 1998 pinaagi sa Japan International Cooperation Agency (JICA). Ang 15 ka ektaryang luna migasto og P209 million. Ang desinyo niining maong labayanan sa basura sa Cebu City molungtad lamang og pito ka tuig kun kutob lamang unta ang operasyon niini sa tuig 2005, apan nasayud kita kon hangtud kanus-a kini gigamit sa Dakbayan isip tam-okanan sa basura. Nahibawo usab kita nga kadaghanan sa ilabay sa maong dapit mga bulsita ug ubang mga butang nga hinimo sa plastic nga dili gayud madunot. Nahunong ang paggamit sa ISL human ang Korte Suprema niisyu og Writ of Kalikasan tungod sa kiha nga gipasaka ni karon Konsehal Joel Garganera.

Karong bag-o, ang NRG Group Australia, misumiter og unsolicited proposal ngadto sa Cebu City alang sa pagtukod og waste to energy (WTE) facility aron malimpiyo ang liboan ka toneladang basura sa ISL nga mao ra usab ang isugnod sa makina alang niining WTE nga way gasto ang Siyudad. Ang maong kompaniya motukod og planta ug mosugod sa operasyon human sa pinirmahay sa joint venture agreement (JVA). Sumala sa NRG Group Australia nga molanat og pito ka tuig ang ilang paglimpiyo sa landfill.

Maayo kining maong proyekto kay makalimpiyo sa maong labayanan sa basura ug mawala na ang kabaho ug polusyon sa maong dapit. Kuyaw usab nga mobuto ang nagtipun-og nga mga basura nga maoy sagad mahitabo tungod sa methane gas nga mamugna niini.

Maayo kining ingon niining proyekto kay makasulbad sa problemang dala sa mga basura. Mokita pa ang Siyudad sa mabahin niini sa halin sa bi-products sa ma-recycle nga mga plastic pinaagi sa pyrolysis samtang mapun-an usab ang enerhiya nga gikinahanglan sa dakbayan. Hinaut pang masulbad usab nila ang gikahadlokan nga air pollution nga dala sa pagsunog sa mga basura. Anaa na man kunoy mga teknolohiya nga magamit aron mapugngan ang polusyon kay mao ra ba kini goprotestahan sa katawhan nga mobatok niining susamang proyekto.

Ang mga suki sa nagkalainlaing kapihan sa Sugbo kanunay nga maghisgut sa bag-ong nilingkod sa Office of the Presidential Assistant for the Visayas (OPAV) puli kang Michael Dino nga si Terence Calatrava.

Daghan na usab kaayong nangangkon nga ilang kaila si Calatrava ug ang uban nangangkon nga sila maoy nagrekomendar kang Calatrava ngadto kang Presidente Bongbong Marcos aron maoy itudlo nga OPAV secretary. (mannyrabacal1144@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph