GUSTO ka bang makaadto sa ‘langit’ nga maoy gingharian sa Diyos samtang padayon ka nga nagpahimos sa kaanindot sa kalibutan nga imong gipuy-an?

Dako na kining posible sanglit sa Garin Farm nga nahimutang sa Barangay Huna, lungsod sa San Joaquin, Iloilo imong makita ug daw ibayaw ka sa kalangitan.

Sa gawas nga bahin sa 14 ektaryas nga propiedad, nagtuo ka nga ang sud niini mao ra ang mga hayop sama sa manok, itik, baboy, kanding, kabaw ug ubang matang sa hayop.

Pinaagi sa entrance nga P150, imo nang masuroy ang tibuok farm diin sentro sa ilang atraksyon mao ang 428 ka tikang paingon sa daw langit nga gipalibutan sa panganod human sa imong pagsubay sa ngitngit nga dan ilawom sa tunnel.

Kini ilang gitawag og “Garin Farm Pilgrimage, A Journey from Creation to Ascension” diin imong masud-ong ang mga espirituhanong mga hulagway nga ginama sa tawo paingon sa Divine Mercy Cross nga nahimutang ibabaw sa bungtod.

Gikan sa entrance, mosakay ka og gulf car nga mosubay sa 375 metros nga tunnel diin gialirongan kini sa curtain vine paingon sa ilang restaurant diin manukad ang mga bisita.

Maaninaw usab nimo ang kaanindot sa kinaiyahan ug imong malantaw ang halapad nga kadagatan.

Kon ikaw gikan sa Cebu, labing dali nga paagi mao ang pagsakay og ayroplano ug human sa 55 minutos nga biyahe, maabot kana sa Iloilo International Airport.

Kon wa kay sundo nga sakyanan, maayo nga mosakay og shuttle bus paingon sa SM City, Iloilo ug mosakay sa SM Mandurriao jeepney ug hunong sa intersection ilawom sa overpass ug sakay na usab og PUJ paingon terminal sa Barangay Mohon, lungsod sa Oton.

Ang Garin Farm nahimu­tang 52 kilometros gikan sa Iloilo City.

Gikan sa terminal, adunay daghang mga PUJ nga andam mopasakay kanimo pinaagi sa P60 nga plite paingon sa San Joaquin diin nahimutang ang Ga­rin Farm sa San Joaquin nga gi­­­­panag-iya sa impluwensiyadong pamilya nga Garin sa Iloilo.

Gawas sa pilgrimage, ang Garin Farm aduna say zipline, swimming pool, lagoon, cottages alang sa gustong moistar og pipila ka adlaw ug lamian nga pagkaon sa ilang restaurant.

Aduna say horse back riding, kayak, pedal boat, rubber boat, water bike, water ball, hilltop fishing ug all terrain vehicle diin lainlain ang presyo sa bayad ug aduna sad silay conference room.

Kon desidido ka nga moduaw sa Garin Farm, mas maayo magdala og payong kay depensa sa init sa adlaw ug di mahibaw-an mokalit lang og uwan, magdala og laing senina kay grabe ang singot.

Mahimo sab nimo mabisita ang kapin na sa usa ka siglo nga simbahan nga gihimo sa mga Español ug ang ilang San Joaquin cemetery nga kanhi gisakop sa España.