GUBOT pa sa lukot.
Kini maoy saktong ikahulagway sa senaryo nga nasinati sa PBA karon tungod niining kontrobersiyal nga mihugpa sa maong lega nga naglambigit ni commissioner Chito Narvasa.
Sayo sa buntag kagahapon, ang mayoriya sa board nga gilangkuban sa pito ka mga team representatives naghugpong ug nagkahiusa sa pagpasaka og resolution nga dili na bag-ohan pa sa iyang termino si Narvasa tungod sa ilang kakuwang og pagsalig niini.
Ang mga mitambong sa maong special meeting gilangkuban nilang Ramoncito Fernandez sa NLEX, Patrick Gregorio sa TNT Ka Tropa, Al Panlilio sa Meralco, Mert Mondragon sa Rain or Shine, Dickie Bachman sa Alaska, Silliman Sy sa Blackwater ug Raymond Zorilla sa Phoenix Petroleum.
Si Fernandez kinsa maoy vice-chairman sa board, nagkanayon nga dili lang kay ang kontrobersiyal nga trade tali sa Kia Picanto ug sa San Miguel Beer maoy ilang gikuhaan og basi sa pagpalagpot ni Narvasa kon dili ang kakuwang na gyud nila sa pagsalig niini gikan pa kaniadto.
“It’s a simple loss of confidence, among other things, including performance,” matod ni Fernandez. “The trade is not the main issue. It’s really a loss of confidence already.”
Sa maong meeting, walay nitambong nga representative sa San Miguel Beer, Barangay Ginebra, Star Hotshots, Kia Picanto ug GlobalPort. Sa samang higayon, gitudlo usab si Rickie Santos nga maoy officer-in-charge sa maong lega sa tuyo nga dili mahunong ang inadlawong operation niini.
Apan unsang pagka-unsaa nga nianang pagkahapon, nabali ang hangin ug gikataho nga magpabilin si Narvasa nga commissioner human kini suportai sa lima ka board representatives nga gipangulohan ni Robert Non, governor sa San Miguel Beer.
Matod ni Non nga dili madali ang pagpalagpot ni Narvasa sa iyang puwesto tungod kay ang gihimo nga panagtagbo sa pito ka mga representatives wala mahisubay sa mga lagda ug konstitusyon sa lega.
“They cannot just act on a whim. What they are doing is not in accordance with our by-laws and constitution. All five teams – San Miguel, Ginebra, Star, Kia and Globalport – stand behind Commissioner Narvasa. He enjoys our full support and we have prevailed upon him to stay and do what is right,” padayag ni Non.
Gipasabot ni Non nga ang ilang gihimo nga gipangulohan sa nasagmuyong mga sakop sa PBA board nga gipangulohan sa Talk and Text wala itugot ug wala kini ilha sa lega.
“These officials do not constitute the majority needed to remove or appoint the commissioner and thereafter, make any changes in the PBA structure," dugang ni Non.
Iyang gipasabot nga ubos sa PBA rules, ang mayoriya nagkinahanglan og two-thirds o walo sa ilang 12 ka mga sakop aron ilang mataktak ang commissioner.
Matod pa nga ang mga representatives sa San Miguel, Star, Ginebra, GlobalPort ug Kia wala mo attend sa meeting kagahapon sa buntag tungod kay niadtong Oktubre 30 pa kini gipahibawo, ug dakong supak sa lagda nga kinahanglan ipahibawo kini pito ka adlaw sa dili pa ang meeting.
Sa ato pa, mahulog nga mabaliwala ang tanang gi-discuss sa meeting lakip na ang pagtudlo kanila kang Ricky Santos isip Officer-in-Charge sa lega.
“This move does not sit well with the rest of us board members. Any move should be made in the proper forum and must be covered the league’s rules and regulations. Any move beyond this is definitely not allowed," dugang ni Non.
Kagahapon sa alas kuwatro ang takna, si Narvasa nagpatawag og press conference ug mipadayag nga hugot siyang magpabilin sa iyang puwesto.
“What call for parity are they talking about?” matod ni Narvasa. “I have always ensured parity in all decisions I made as commissioner, not only in the trade involving Kia and San Miguel Beer, but even when Talk ‘N Text acquired the first-round picks of Kia and Blackwater in the past to get Mo Tautuua and Troy Rosario.”
Hangtod ning pagsulaw wala pay tino nga pamahayag ang pikas habig. (JBM)