NAILHAN na sa kapulisan sa dakbayan sa Talisay ang kauban ni anhing Jessie Largo sa pagpatay sa 22 anyos nga si John Ronli Calizar.
Ang kapulisan nipasaka nag kasong murder batok kang Largo ug sa laing usa nga wa pa mailhi.
Si Largo napatay sa kapulisan sa Talisay sa dihang ila na untang dakpon apan giingong misukol.
Niadtong Lunes sa buntag ang Talisay police miduso og supplemental affidavit human nila mailhi ang laing suspek.
Si SPO1 Cecelio Miñoza, imbestigador sa kaso, niingon nga ang laing suspek aduna nay laing kasong attempted murder.
Ang laing suspek positibong giila sa ilang saksi ug dali silang nihimog background investigation sa pagkatawo niini.
Hinuon nagdumili pagbutyag si Miñoza sa pangan sa laing suspek.
Iyang gibutyag nga niadtong Martes adunay laing duha ka mga saksi ang miadto sa ilang buhatan.
Ang duha nihatag usab og kasayuran labot sa pagkamatay ni Calizar. (DRT)