PAREHONG nakigtagbo kang Gobernador Hilario Davide III kagahapon ang mga asawa ni Leodegreco “Greco” Sanchez, kinsa bag-o lang naglaslas sa iyang pulso sulod sa Cebu Provincial Detention and Rehabilitation Center (CPDRC).
Sa receiving area sa governor’s office nag-abot ang duha ka Misis Sanchez, si Kathy nga maoy una nga asawa ni Greco ug si Asst. Prosecutor Mary Ann Castro nga asawa niini ubos sa tinuohang Islam.
Wala hinuon sila magtagad.
Si Kathy maoy unang gikatagbo sa gobernador.
Nihatag kini og impormasyon labot sa kasaysayan sa iyang bana sa paglaslas og pulso kaniadto aron lang magpatagad.
Dihang nigawas na si Kathy sa opisina sa gobernador ug paingon na usab nga mosulod si Mary Ann, wala gihapon sila nagtagad ug igo lang nagsugat.
Atol sa iyang pag-atubang kang Davide, nipadayag si Castro sa iyang kadismaya nga di siya mahimong makaduaw kang Greco sa prisohan.
Matod niya, ang tulo lamang ka mga abogado sa iyang bana ang gitugotan nga makaduaw ug di ang mga sakop sa iyang pamilya kay kanselado ang iyang dalaw.
Kon dili magamit nga rason ang iyang pagka-asawa aron duawon si Greco, moapil na si Castro sa legal team sa iyang bana, butang nga matod pa gitugot alang sa mga piskal kon dunay sakop sa pamilya nga malambigit sa kaso.
Sigun ni Castro, nakakuha na siya og pagtugot gikan sa secretary sa Department of Justice alang niini.
Mohatag siya og kopya niini sa provincial government aron hingpit na niyang maduaw ang iyang bana isip usa sa iyang mga abogado.
“I know how to handle my husband, it’s my husband after all. Likoy man siya, somehow ba between husband and wife, murag kahibalo ko mo-handle niya para lang dili siya ma-depress, para dili siya mo-violate sa whatever is the policy inside CPDRC,” niingon si Castro.
Si Davide niklaro nga hangtod di makapakita og dokumento si Castro nga magmatuod nga usa siya sa mga abogado ni Greco, hayan way rason nga makaduaw kini niya diha sa prisohan.
Sa wala pa nakigtagbo ang duha ka Misis Sanchez sa gobernador, unang gikatigum ni Davide si CPDRC Assistant Warden Audesti Miguel.
Giklaro niya nga dili pagyatak sa tawhanong katungod ni Greco ang pagbutang kaniya og linain o personal nga selda.
Una nang gisaway ni Castro ang paghimo niini human usab kini niresulta sa paglaslas ni Greco sa iyang pulso.
Giklaro ni Miguel nga dili bartolina ang gibutangan kang Greco kundi usa ka personal cell, diin siya lang usa ang tawo. Duna kini banyo ug dunay bintana apan gihimug-atan niya nga di kini special treatment alang sa maong piniriso. (AZDL)