PANAHON ni kanhi mayor Mike Rama gisirad-an ang 15 ektarya nga Inayawan Sanitary Landfill nga labayanan og basura sulod na sa 18 ka tuig. Didto na itam-ok sa Asian Energy System sa Polog, Consolacion.
Nagplano si Rama nga himuong parke, tukoran og mall ug waste-to-energy facility ang maong landfill.
Gianugnan si Mayor Tomas Osmeña sa P20 million matag bulan nga bayad sa Consolacion maong iyang gipabuksan og balik.
Disyembre 15, 2016 ang Court of Appeals mimando nga ipahunong ang operasyon sa Inayawan ubos sa 36 ka violations basi sa Writ of Kalikasan nga giisyu human moreklamo si Konsehal Joel Garganera basi usab sa rekomendasyon ni kanhi DENR secretary Gina Lopez kay dakong hulga sa kinaiyahan.
Bisag asa nalang ang basurahan hinungdan nga ang basura gikan sa Korea didto na itam-ok sa Tingub, Mandaue diin pakyas ang maong pagpanapi.
Dihay higayon nga adto sa SRP isip temporaryong transfer station apan gipaundang sa EMB7 kay nangreklamo ang duol nga mga establisamento kay mikuyanap ang kalang-og ug misiaw ang mga langaw.
Kadto pang Jomara Konstruck maoy mihakot sa basura ngadto sa Compostela, balik sa Consolacion, Aloguinsan, Evo Environment sa Inayawan ug gibalikan og labay ang gisiradoan nga landfill hinungdan nga mipasaka og kaso si Apas Barangay Kapitan Ramil Ayuman ngadto sa Office of the President batok nila ni Mayor Osmeña ug Konsehal Margot Osmeña.
Mi-file usab og kaso si Garganera sa sitwasyon sa Evo Environment nga dili na transfer station kay nagliundok ang basura.
Mga tigpaniid sa kalikopan mitataw nga walay klarong environmental programs ang kagamhanan sa siyudad.
Si Nida Cabrera nga maoy consultant sa environment wala gani makahapsay sa waste segregation sa iyang tugkaran sa Barangay Luz. Pun-an pa sa kahugaw sa kasapaan. V-hire terminal sa Kamagayan mobuga og carbon monoxide. Landfill ug power facility sa Binaliw nga iya sa ARN Builders diin ang illegal quarry nakaguba sa kadalanan sa Tapuko, Pit-os gumikan sa mga dumptrucks nga nagkarga og yuta.
Sanglit natapos ang kontrata sa Jomara, ang Pamocor nga nakadaog sa subasta maoy mihakot sa basura gikan sa transfer station sa Inayawan ngadto sa Consolacion nga giingong mahal ang bayad.
Mipuli ang Jomara ug karon mibalik na sab ang Pamocor sa pagpaabang og sakyanan sa basura isip service provider nga mahal ra ba.
Gani gikwestyon ni Alcover ang P400M nga gahin sa basura sa 2018 lakip na sa abang sa heavy equipment P65M nga sa panahon ni Rama P112M lang.