More Articles
Balak: Agulo kong kalagnon
Mar Manus, Jr.
Basak-Iba, Lapulapu City
SA ilawom ning yuta
Ning dapit nga awaaw
Adia ko, pinangga,
Nagbakho sa kamingaw.
Uhaw sa dinagaang
Sa Adlaw nga mosidlak,
Kangiob day kauban
Ning akong pagkahunlak.
Way bugto king pagbakho
Way hunong king pagmahay
Kay imong gidinawo
Ang gugma mong tiunay.
Ngano pa kong natawo
Dinhi ning kalibutan
Nga ang tanan kong gidamgo
Kapakyas may gidangatan?
Ania king lubong ko
Hubo sa dayandayan.
Intawon, minahal ko,
Ugboki og timaan!