SUPAK ang usa ka opisyal sa artsidyosesis sa Sugbo sa sugyot ni Cebu City Mayor Tomas Osmeña nga ibalhin sa matag unang Lunes sa Nobiyembre ang paghinumdum sa adlaw sa mga santos gikan sa Nobiyembre 1.
Si Msgr. Ruben Labajo, team moderator sa Cebu Metropolitan Cathedral, nipasabot nga gitahod niya ang opinion sa mayor sa siyudad sa Sugbo apan ang paghukom sa pagbalhin og petsa sa mga kasaulogan sa pista kay iyaha sa simbahang Katoliko.
“Iyaha gyud nang decision sa Church, when it comes to fiestas or celebration that belongs to the church,” pahayag niini sa pakighinabi sa Superbalita Cebu kagahapon.
Si Osmeña mohangyo nila ni Kong. Rodrigo Abellanosa (south district) ug Kong. Raul del Mar (north district) nga mopanday og balaudnon nga himuong holiday ang unang Lunes sa Nobiyembre agi og paghandum sa adlaw sa mga santos.
Apan alang kang Labajo dugay na nga tradisyon sa nasod ang pag-obserbar sa nasod sa Nobiyembre 1 sa paghinumdum sa adlaw sa mga santos.
Suma pa niini anaa sa Santo Papa ang paghimo og kausaban sa petsa sa mga selebrasyon sa kapistahan sa simbahang Katoliko.
Si Labajo niangkon nga dunay mga higayon nga mag-usab-usab ang mga petsa sa kasaulogan sa kapistahan sa lainlaing mga santos sa simbahan nga dili motungod sa adlaw.
Apan bahin sa All Saints’ Day, matod niya, lisod na kini mausab kay sud na sa pipila ka siglo nga kini handumon sa Nobiyembre 1.
Kini gawas lang kon isugyot sa konseho nga tigsugyot o tigtambag sa Santo Papa ang pagpabalhin sa adlaw sa mga santos sa laing petsa ug dili na sa Nobiyembre 1. (SCG)