GIPAUBOS sa Sangguniang Bayan sa state of calamity ang unom ka mga barangay sa lungsod sa Boljoon gumikan sa padayon nga pagdahili sa yuta tungod sa sige og ulan sud sa lima ka adlaw.
Ang Mines and Geosciences Bureau (MGB) 7 nirekomendar nga di na papuy-an og tawo ang sityo Calfranco, Barangay Lower Becerril kay gideklarar kini nga ‘permanent danger zone’ gumikan sa padayon nga paglihok sa yuta.
Atol sa emergency session kagahapon sa alas 5 sa hapon, ang konseho sa munisipyo sa Boljoon nideklarar og state of calamity sa mga barangay Lower Becerril, Poblacion, Lunop, Upper Becerril, San Antonio ug Nangka base sa rekomendasyon sa Municipal Disaster Risk Reduction and Management Council diin 18 ka mga pamilya ang apektado.
Ang barangay council sa Lower Becerril unang nideklarar og state of calamity pagkabuntag.
Base sa Geohazards Mapping and Assessment Team sa MGB 7, taas ang kahigayonan sa landslide sa Sitio Calfranco nga peligro sa mga tawo nga nanimuyo sa lugar sa sige og ulan sukad sa miaging semana.
Si Eutemio Ternate, pangu sa Municipal Disaster Risk Reduction and Management Office, nibutyag nga dunay nahabilin nga kapin sa P970,000 gikan sa quick respond fund nga magamit alang sa pag-ayuda sa apektadong mga pamilya. (SCG)