KUMUSTA, mga higala? Napura ba kamo'g kinao'g biko agi'g duyog sa All Saints' ug All Souls' Day niadtong November 1 and 2? Kung mao, panghatag pod!!! Wala may seremonya dinhi sa amo. Nagpuyo ra intawon mi sa akong pamilya dinhi sa balay kay nagpahayahay!
Wala na mi kabisita sa mga lubnganan sa among kaparyentehan kay kasagaran kanila naa man gilubong sa kaulohan. Sa ako pod manghod nga si Cloyd nga anaa sa daang sementeryo sa Panabo, purya-gaba...gitabunan naman og dakong pantiyon ang iyang lubnganan. Intawon, wala na kamiy malili bisan lapida man lamang.
Grabe pod ning uban no, bisan sa pamilya sa minatay-wala gayud karespeto. Kung sa inyong minatay kuno kana buhaton, dili kaha manginit ang inyong ulo??? Kalami na lang gayud bungkagon ang maong dakung pantiyon nga ilang gipatong!
Bitaw, ang mga patay dugay ra kana sila nagpahulay apan ang buhi pa nilang mga paryente kursonada pa gihapon mangalagkalag, mare. Tradisyon na man god kini sa kadaghanan sa pamilyang Pilipino mao mobaton unta kita'g gamay'ng konsiderasyon ug respeto.
Dili man moreklamo ang mga patay bisan sunugon nato apan sa atong mga nagaginhawa pa, dili lalim ang pagbuhi sa mga panumdoman nato sa mga paryente nga wala na karon sa kalibutan.
Wala ko nagaapil sa uso-uso o mga tinuohan sa kadaghanan kanato apan wala pod koy angayang isulti kanila kay managlahi baya kita'g mga tinuohan ug tirada. Mao, walay ni usa kanato ang manghusga, di ba? Pero nalagot gayud ko sa nagtungtong og pantiyon sa lubnganan sa manghod nako, grrrrrrrrrrr!
Anyway, taastaas ang nahimong bakasyon sa mga estudyante dinhi sa among dapit kay lagi, semestral break kaniadto pang petsa 30 sa Oktubre unya niadto lang Huwebes, petsa 2 sa kasamtangang bulan gipabalik sa ilang mga tulunghaan. Nakapahulay intawon gamay sa daghang labada ug hipuson ang mga ginikanan, nakatipid sa galastuhon sa plite ug balon plus, naka-bonding pa gayud ang pamilya bisan anaa lamang sa sulod sa panimalay nila. Dili ba nindot ug makalingaw kana, higala?
Wala na kami nangadto sa sementeryo kay naa ra man duol sa panimalay ang among paryente nga ginadala namo sa pag-ampo, mare. Wala na man goy tsansa alang sa mga minatay apan sa atong mga buhi- posible pa ang mga himala!
Matud sa mga drayber natong mga kahigalaan dinhi sa Panabo, dili na daw sama kaniadto ang kadaghan sa mga tawo nga ning adto karong tuiga sa sementeryo. Indikasyon kaha ni sa mga kabag-ohan nga dinala sa huyop sa kahanginan o epekto na kini sa mga bag-ong panghitabo ug managlahi natong mga tinuohan? Na-busy lang gayud pod seguro ang uban o basi'g naglikay ra pod ang atong mga kaigsuonan nga maabtan og ulan didto sa sementeryo o kadalanan. Kamo, unsay rason ninyo nganong wala pod mo nangadto? Chikahi pod ko. See you!