NANAGKOT mi uban sa akong pamilya didto sa lubong sa akong mga apuhan sa Digos City, ug daw nabati ko gyud ang tumang paghangop ngadto kanila pinaagi sa mga preskong buwak nga akong napalit gawas sa sementeryo.

Daghan kog naagian nga mga nanindag buwak, pero didto gyud ko gidala sa akong duha ka tiil sa suok nga tindahan, ug wa koy duha-duhang mipunit sa duha ka kaang nga presko kaayong tiger flower sa kantidad nga tag P50 matag usa ka kaang.

Didto malipayon kaayo ko nga mibutang sa mga buwak sa lapeda sa akong mga apuhan, nga nasugilon ko na niadto nga mas milabaw pa sila sa akong mga ginakanan diha sa pagmahal tungod sila naman akong namat-an og buot.

Nanagkot mi'g mga kandila, ug diha sa mga lubong tupad sa pantyon sa akong mga apuhan naglaray sab ang mga preskong buwak, ug diha'y buwak nga nakadani sa akong atensyon.

Didto sa usa ka lubong di lang layo kanamo, napuno og presko nga mga buwak ang ibabaw sa pantyon, giduol nako ug nakita nako ang hulagway sa namatay. Usa ka batan-ong lalaki nga nagpangedaron og 18-anyos subay sa impormasyon nga napatik sa iyang lapeda.

Batan-on pa kaayo, og makita sa iyang dagway nga aduhan siya. Sa laing lubong sab, mibilib ko sa edad sa namatay kay natawo siya tuig 1876 ug namatay siya 1975, buot pasabot 99-anyos siya dihang namatay.

Subli ko nga nakahinuklog sa gisangyaw sa Pari sa Kasaulogan sa Misa sa patay sud sa sementeryo niadtong mga higayona, diin giingon nga ang kamatayon walay gipili nga panahon, walay gipili nga edad, ug walay gipili nga estado sa kinabuhi.

Giingon sab nga ang kamatayon moabot sa kinabuhi nga sama sa usa ka kawatan nga wa nimo damha nga nakawatan ka, nga wa nimo damhang moabot imong pagsubo kay nahanaw ang usa ka butang.

Gani, diha ko'y silingan, usa ka traysikol drayber, matag adlaw siya nga gahulat nako kay mosakay ko sa iyang traysikol padung sa kanto nga hulatanan og dyip. Wa nako damha nga wala na diay siya human ma-comatose kay giatake sa kasingkasing gumikan sa iyang balatian nga hypertension, kagahapon.

Diha sab mi kauban sa opisina, maayo pang pangataw-anay usa ka kahaponon, dayon pagka kaadlawon nahibal-an nalang namo nga nadisgrasya kini sa iyang gimaneho nga motorsiklo ug namatay.

Niining pagkaagiha, kinahanglan nga andam gyud diay kita sa kamatayon, kay wa ta masayod ugma damlag ug sa umaabot, moabot kini sa atong kinabuhi, kay kitang tanan, mopanaw man gyod ning kalibutana, nauna lamang sila.

Di lamang panahon sa 'Todos Los Santos' nato i-ampo ug duawon ngadto sa lubnganan ang atong mga minahal nga mipanaw na sa laing kalibutan, kundi matag higayon sa atong mga pag-ampo, i-apil nato sa pag-ampo ang ilang mga kalag.