COTABATO CITY - Dismayado ug nawad-an na sa paglaum ang pamilya sa 58 ka tawo nga niluog nga gipatay, apil ang 32 ka sakop sa media didto sa Sitio Masalay, Barangay Salman Ampatuan, Maguindanao, niadtong Nobyembre 23, 2009.

Hangtud karon ngitngit pa sa alkitran nga makab-ot nila ang tinuod nga hustisya sa mga gipangpatay.

Gitanum na lang sa gobyerno sa kalimot ang mangilngig nga kamatayon sa 58 ka tawo nga biktima sa away sa politika.

Gawas sa pamilya sa mga biktima, hustisya sab ang singgit sa mga gipangdakop nga uban kanila walay kalabutan sa pagpatay sa 58 ka tawo ug naangin lamang diin hangtud karon nakakulong pa.

Gibatikos sab sa pamilya sa mga biktima ang kahinay sa pagtaral sa kaso sa korte ug wala pa masilutan ang mga tawo nga tinuod nga dunay kalabutan sa mangilngig nga krimen.

Wala sab matutukan sa administrasyon ni Pangulong Rodrigo Duterte ang Maguindanao Massacre gumikan naka-sentro ang kampanya niini sa ilegal nga druga, terorismo ug kurapsiyon.

Apang nanghinaut gihapon si Maguindanao Governor Esmail "Toto" Mangudadatu nga ilawom sa administrasyon ni Pangulong Duterte makab-ot na nila ang dugay na nilang gipaabot nga hustisya sa mga biktima sa masaker.