KIBLAWAN, Davao del Sur - Mihimo og tigum ang mga opisyal sa barangay, lungsod, kapulisan ug militar kauban ang kadagkoan sa tribung B'laan aron masulbad ang gikabalak-ang "Pangayaw" sa lugar niadtong Huwebes.
Sumala ni Senior Inspector Erich Von Requilman, hepe sa Kiblawan Municipal Police Station, usa ka konsultasyon sa mga pamuno sa tribung B'laan, lokal nga pamuno sa National Commission on Indigenous People (NCIP), kauban ang mga sakop sa 73rd Infantry Battalion, Davao del Sur Police Provincial Office (DSPPO) ug mga kapitan sa tulo ka mga apektadong barangay ang mitambong.
Nipatunga sab si Mayor Jason Carl Rama sa maong tigum aron tukion ang nahitabo sa Barangay Kimlawis diin duha ka mga tinun-an ang namatay samtang naangol ang laing pito human gibanhigan sa grupo sa mga bandido.
Misaad ang lokal nga gobyerno nga mohatag og ayudang pinansiyal sa mga pamilya sa namatay apil ang pagpa-ospital sa mga naangol.
Kahinumdoman nga nasundan pa ang pagpamusil human gibanhigan patay sa mga bandido ang 62-anyos nga si Cristituto Piras, usa ka mag-uuma sa Barangay Kimlawis samtang pauli ug patabok na sa Mal River niadtong Miyerkules.
Dungan niini, nagmugna na og Special Investigation Task Group Linkanay ang kapulisan aron mailhan ug makasohan na ang mga suspek nga mihimo sa ambush.
Hinuon, mag-alayon ang puwersa sa kapulisan ug militar aron mahibalik sa normal ang sitwasiyon ilabi na sa bukirang bahin sa lungsod diin nagpahipi ang mga bandido.
Samtang, apil sa maong Task Force ang Criminal Investigation and Detection Group (CIDG) sa probinsiya ilawom sa pagpamuno ni Chief Inspector Francis Sonza.
Sumala ni Sonza nga aduna nay gisundang suspek ang Task Force ug gihikay na ang mga dokumento aron mapasaka na ang kaso.
Nagpatabang na sab sila sa mga tribal chieftains sa tribung B'laan aron makontrola ang padayong panimawos sa grupo.