TACURONG CITY - Walo na sab ka mga miyembro sa New People's Army (NPA) ang misurender alas 11:15 sa buntag niadtong Huwebes sa probinsiya sa Sultan Kudarat.
Gibutyag ni Captain Rogelio Agustin Jr., commanding officer sa Charlie Company sa 33rd Infantry Battalion, Philippine Army nga walo ka NPA gikan sa Barangay Kuden Senator Ninoy Aquino sa maong probinsiya ang mitahan sa kaugalingon ngadto sa kasundalohan.
Dala sa mga rebelde sa ilang pagsurender ang duha ka M16 Armalite rifles, duha ka bomba ug mga buhing bala.
"They were very tired and hungry after months of evading our patrols in the forests."
"It is fortunate that they heard about the good stories about the other rebels who had surrendered to our unit in the past months," matud ni Agustin.
Gikanayon sab ni 1st Lieutenant John Jamora, commanding Officer sa Alpha Company sa 33rd IB, nga sila Ka Bobby ug Ka Jimboy nga mga platoon leader sa Cloudphone Company nga una nang misurender niadtong bulan sa Septyembre maoy miaghat sa walo ka NPA nga mobalik sa sabakan sa balaod.
Si Michael Galing, usa sa mga NPA nga misurender, namahayag nga dili na nila maaguwanta ang sobrang kagutom sa pagtago-tago sa kabukiran ug gusto na sab nga manginabuhi nga malinawon uban ang ilang mga mahal nga pamilya.
Gidayeg sab sa mga NPA ang pagtabang ni Mayor Randy Ecija ug ang 33rd IB, nga gipangulohan ni Lieutenant Colonel Harold Cabunoc, sa mga tribo nga manobo nga maresulba ang away sa yuta nga ilang giugmad.
Nagpasalamat sab si Cabunoc sa puwersa sa 1st Mechanized Infantry Battalion, 26th Military Intelligence Company, Sen. Ninoy Aquino Municipal Police Station ug mga lokal opisyal nga mitabang aron aghaton ang mga NPA nga mga Manobo nga mobalik sa sabakan sa balaod.
Sa kasamtangan, moabot na sa 60 ka NPA ang misurender gikan sa maong lugar.