MALINAWON ang paghulagway sa Police Regional Office (PRO)-Northern Mindanao sa kasaulogan sa paghandom sa Adlaw mga Santos ug

Kalag.

Kini ang gibutyag ni Police Superintendent Lemuel Gonda, kinsa tigpamaba sa PRO-Northern Mindanao, kinsa niingon nga sa pag-obserba sa tibuok rehiyon walay mga dagkong insidente nga nahitabo ug malipayon nga nipahibalo nga nalutsan kining mga hulga sa pagpangsabotahe niining mga terorista.

Gipaabot sab ni Gonda iyang dakong pasalamat sa mga force multiplier nga dako og tabang sa kalinaw sa selebrasyon.

Ang mga pulis nga halos 24 oras nga naka-monitor ug nakabantay sa palibot sa dakbayan hilabina niadtong nakabantay sa mga sam-ang ug nakakumpiska sa mga ginadili nga butang. Nagpasabot lamang nga hugot ang pagbantay ug pagsusi sa mga dalang gamit sa mga mibisita sa mga sam-ang.

Sa dakbayan sa Cagayan de Oro, nanawagan si Police Senior Inspector Jason Sto. Domingo, kinsa deputy station commander sa Police Station 2 sa Cogon, niadtong katawhan nga nagbisita sa pinakadakong sementeryo sa dakbayan ang Bolonsori Cemetery nga pwede nilang i-claim ang ilang mga gamit nga nakumpiska.

Apan dili na makuha og balik ang ilimnong makahubog og hait nga hinagiban.