WA gyud ko mahimutang dihang akong nakita ang gi-post sa Office of Presidential Assistant for Visayas (OPAV) kabahin sa usa ka balita kabahin sa usa ka Yolanda rehabilitation site sa Antique.
Alang kanako, mas maayong maklaro kini labi na kay karon nang Nobyembre 8, 2017 ang ikaupat nga sumad sa maong kalamidad ug usa ka tuig na sukad gitahasan ni Presidente Rodrigo Roa Duterte si Presidential Assistant Mike Dino nga atemanon ang mga Yolanda survivor.
Tinubdan sa maong balita mao si Fr. Jose Elmer Cajilig, ang Region 6 lead convenor sa pro-Duterte mass movement nga Kilusang Pagbabago.
Matod pa, gisusi nilang Fr. Elmer ang taho kabahin sa usa ka baha sa miaging Oktubre 20, 2017 nga nakaapekto sa lima ka barangay sa lungsod sa Bugasong, Antique. Gitumbok nga hinungdan mao ang wa pa mahuman nga Yolanda rehabilitation site sa Lacayon, Bugasong, Antique.
Makasabot man ko sa punto sa OPAV, bisan og para nako wa sila motug-an sa tinuod, nga wa silay labot sa Yolanda rehabilitation. Ila kining gi-post sa Facebook.
Ang ngil-ad para nako mao ang pag-superimpose sa mga pulong “Fake News” sa istorya kabahin sa kahimtang sa mga Yolanda survivor sa Antique.
Matod pa ni Fr. Elmer isip iyang reaksyon, makasubo ang pagpadaplin sa reklamo sa mga mag-uuma pinaagi sa pagtawag niini nga “fake news.”
Mas subo kay kini gibuhat sa opisina nga nag-representar ni Presidente Rodrigo Roa Duterte. Unya, gi-post pa gyud sa usa ka pro-Duterte nga FB page nga daw sila ang admin.
Unya, pro-Duterte baya kini si Fr. Elmer. Gani, atong nasayran nga siya man gani ang liaison karon sa Kilusang Pagbabago ngadto sa Office for Participatory Governance (OPG) nga naa sa Malacañang.
Kon atong palandungon, makita nato niining pagtawag sa maong balita nga fake news sa tinuod nga panglantaw sa OPAV.
Di na ko mahibong hinuon nga kon ingon man niini ang pagtratar sa OPAV ngadto sa mga kabus sa Visayas, motibugsok gyud ang popularidad sa presidente dinhi sa atua.
Balik sa pag-insister karon sa OPAV nga dili si PA Mike Dino ang Yolanda Housing Czar kay duna lagi kunoy gitudlo kaniadtong Disyembre 17, 2016, nganong naabot man kini ang OPAV kuyog og mga tigbalita didto sa amihanang bahin sa Sugbo ug nag-inspeksyon sa mga rehab projects didto?
Gawas pa, nganong manghunaw man si Dino kay kintahay wa siyay official appointment isip Yolanda housing czar nga gianunsyo man kini ni Presidente Duterte sa miaging Nobyembre 8, 2016 didto sa Syudad sa Tacloban.
Dayon, nganong di man sila maghisgot nga co-chairman si Dino sa Inter-Agency Task Force on Yolanda?
Unya, kadtong gipanghambog nga dunay kapin sa 200 ka mga Yolanda survivor nga na relocate na sa Syudad sa Tacloban, didto lang kadto sa usa ka relocation site.
Hangtod karon, wa pa mahuman ang lain pang tulo ka mga relocation site diha sa Tacloban. Susihunon pa ang uban sa tibuok Visayas. Apan subo nga balita kabahin niini ingnon lang dayon nga fake news.