USA sa mga isyu nga gipatugbaw ni Ermita Barangay Captain Felicisimo “Imok” Rupinta sa iyang pagpa-demolish unta sa mga stall sa mga fish vendor mao ang pagbabag niini sa dan Calderon sa merkado publiko sa Carbon.
Giingon ni Rupinta nga mikawat na sa dan ang mga stall. Tinuod man o di, kining mao nga suliran mao usay problema sa ubang mga dapit sa Metro Cebu.
Dinhi lang sa dakbayan sa Sugbo, labina sa dan Colon panahon sa kagabhion, naa ang daghang mga sidewalk vendor mamaligya sa mao nga karsada. Kon ang dan Colon busy pa kaayo sa mga sakyanan sama kaniadto, grabeng trapiko ang masinati unta.
Kining problema sa mga manindahay sa mga karsada ug sidewalk nga nakababag sa mga agianan masulbad unta kon ang Siyudad dunay klarong programa nga magkontrolar kanila.
Di baya ni lisod himuon kay ang vendors dunay aktibong payong nga mga organisasyon.
Ang mga organisasyon mokontrolar sa gidaghanon sa mga manindahay sa matag dapit. Ipakontrolar nila ang nahimutangan ug gidaghanon sa mga manindahay.
Ilang seguraduhon nga ang ilang mga pwesto di makahasol sa mga sakyanan ug pedestrian.
Mahimo silang partner batok sa krimen pinaagi sa paghimo kanilang “intelligence agents” sa ilang nahimutangan. Di sila maoy mosumpo, apan sila ang mohatag og kasayuran sa mga awtoridad kinsa ang mga kriminal pinaagi sa sekretong paagi nga i-channel ngadto sa organisasyon. Ang organisasyon makigtambayayong sa mga awtoridad.
Sila usab ang tugyanan sa paglimpyo sa ilang tagsa ka dapit nga malimpyo. Ang makalapas silutan pinaagi sa pagsuspenso sa pagpaninda.
Kini dako kaayo og ikatabang sa kagamhanan. Karon man gud, ang vendors maorag gatasan ug paon sa pulitika.