NAGKAGULIYANG man tuod ang Philippine Basketball Association (PBA) apan wala ang programa sa Gilas Pilipinas.
Si national coach Chot Reyes wala nakasugat og kahasol taliwala sa kasamtangang kasamok sa PBA ug kumpleto ang puwersa sa Gilas sa pagsugod sa training niini alang sa 2019 World Cup qualifiers nga salmutan niini sugod sa hinapos nga bahin ning buwana.
Ang Gilas moataki sa Japan karong Nobiyembre 24 unya moasdang na sab kini sa Chinese Taipei karong Nobiyembre 27 alang sa qualifiers.
Mibalik si naturalized player Andray Blatche aron suportahan ang Gilas ning malisod nga tahas.
Ningtunga sab sa unang adlaw sa training sa Gilas ang Sugbuanong higante nga si JuneMar Fajardo, pambatong sentro sa San Miguel Beermen.
Sa sayo pa, gikahadlukan nga maapektuhan ang training sa Gilas gumikan sa panagbangi sa team owners sa PBA kabahin sa lakang nga gipangulohan sa tag-iya sa Talk N’ Text KaTropa nga si Manny V. Pangilinan nga palagputon sa puwesto si Commissioner Chito Narvasa.
Gawas nila ni Blatche ug Fajardo, naa sab sila si Jayson Castro, Roger Pogoy ug Troy Rosario, Allein Maliksi, Mac Belo, Calvin Abueva, Carl Bryan Cruz, Raymond Almazan, Gabe Norwood, Japeth Aguilar, Matthew Wright sa Phoenix, Jio Jalalon, Kiefer Ravena ug Terrence Romeo.
Ningtunga sab sila si Baser Amer, Kevin Alas, LA Revilla, Russel Escoto, Kevin Ferrer, Von Pessumal, ug Mike Tolomia aron pagkompleto sa 23-man pool. (ESL)