PANGITAON ang knockout sa matag round.

Mao kini ang misyon ni ALA fighter “King” Arthur Villanueva sa iyang pagpakigbatok kang World Boxing Council (WBC) bantamweight champion Luis “Pantera” Nery karong adlawa sa usa ka non-title bout sa GasMart Arena sa Tijuana, Mexico.

Dili man tuod kini usa ka world title bout apan alang sa kampo ni Villanueva, grabe kini ka bililhon nga away gumikan kay mao kini ang mag-abli og pultahan sa lumad nga taga Bacolod City nga makapanuktok og balik alang sa world title.

“Siyempre kon modaog si Arthur aning awaya unya world champion gud na iyang kontra, dako gyud kaayo og chance nga maka-fight siya og balik alang sa world title,” matod ni ALA stable head trainer Edito Villamor sa pagpakig­hinabi ning mantalaan pinaagi sa Facebook.

Si Villamor maoy kauban ni Villanueva sa Mexico lakip na ang laing ALA trainer nga si Michael Domingo.

Sayod ang kampo ni Villanueva nga silingan sa imposible nga modaog ang 28 anyos nga boksidor pinaagi sa desisyon hinungdan nga kinahanglan kining moagresibo sa labing una pa lang pagbagting.

“Kinahanglang every round, mangita gyud og knockout si Arthur kay lisod man kaayo modaog sa Mexico by decision. Kinahanglan nga ma-dominate gyud niya ang away,” dugang ni Villamor.

“Pero siyempre, dili lang sab gyud mokompiyansa kay knockout artist man sab ni si Nery.”

Si Villanueva adunay 31-2, 17KOs nga rekord samtang si Nery naghupot og impresibong 24-0, 18KOs nga baraha.

Sa pagtuo ni Villamor, dako og poruhan si Villanueva nga modaog ning awaya gumikan kay haom niini ang estilo ni Nery nga dili sab moatras sa binukbokay. (ESL)