MIHATAG og donasyon ang artsidyosesis sa Sugbo sa simbahang Katoliko sa dakbayan sa Marawi sa nagpadayon nga rehabilitasyon sa lugar human giatake sa mga miyembro sa Maute-ISIS group.
Si Cebu Archbishop Jose Palma nibutyag nga gihatag niya ang donasyon kang Marawi Bishop Edwin dela Peña dihang nitambong kini sa lubong ni Cebu Archbishop Emeritus Ricardo Cardinal Vidal sa miaging semana.
Ang arsobispo wa motug-an kon pila ang gihatag nga hinabang, apan gikan ni sa manggihatagon nga higala sa artsidyosesis.
Sama ni Dela Peña, si Palma nasubo sa nahitabo sa Marawi nga naguba gumikan sa gubat nga mugna sa mga terorista.
Ang arsobispo sa Sugbo nanghinaot nga masugdan dayon ang rehabilitasyon sa Marawi ug makabangon ang apektadong mga lumolupyo.
Bisan kon di ingon ka daghan ang mga Katoliko sa Marawi, siya nanawagan nila nga moayuda sa mga pamilya nga naapektuhan sa kagubot.
Nasayod si Palma nga di diha-diha ma-rehabilitate ang siyudad apan siya nanghinaot nga seguraduon kini pagpatuman sa nasudnong kagamhanan.
Sa miaging buwan, si Presidente Rodrigo Duterte nideklarar nga gawasnon na ang dakbayan sa Marawi gikan sa mga kamot sa Maute-ISIS group human sa lima ka buwan nga pakiggubat sa pwersa sa kagamhanan.
Pipila na lang ka mga sakop ang gigukod sa militar ug kapulisan human napatay ang mga lider sa grupo nga sila si Isnilon Hapilon ug Omar Maute.