NAG-ULI na sa maayong kabubot-on silang Bise Gobernador Agnes Magpale ug Provincial Tourism Officer Joselito “Boboi” Costas hinungdan nga di na siya modayon sa pag-resign.

Kini human nangayo og pasaylo si Costas sa bise go­bernador sa mga “palpak” sa Provincial Tourism Office, ilabi na sa kapakyas sa pagpakig-alayon sa Provincial Tourism Council, nga gi­pangu­luhan ni Magpale.

Personal nga nakigtagbo kang Magpale si Costas kagaha­pon sa buntag ug nangayog pa­saylo sa matod pa, mga palpak nga nahimo sa iyang opisina.

Lakip sa mga palpak nga una nang gitumbok ni Magpale mao ang kapakyas pagpakig-alayon sa PTO sa Provincial Tourism Council, pagpili sa Big 5 destinations sa Sugbo, kapakyas sa pag-imbitar sa Department of Tourism atol sa Inter-Island Tourism Policy (ITOP) Forum ug ang wa pagkalakip sa mensahe ni Magpale sa gilusad nga tou­rism magazine sa Kapitolyo.

Gitug-an ni Magpale nga na­ngayo na og pasaylo si Costas kaniya atol sa ilang tigom ug gidawat na usab niya ang apology niini.

Matod niya nga wa maanad si Costas sa mga proseso sa gobiyerno hinungdan nga wa na sa iyang huna-huna ang pagpakig-alayon kang Magpale ug sa Provincial Tourism Council.

Giangkon hinuon niya nga wa siya matagbaw sa rason ni Costas nganong nakahimo sa maong mga palpak.

Samtang si Costas, sa iyang press statament, nipasabot nga ang iyang pagbutang kang Magpale sa sulod nga pahina nga nagpakita sa pagpaila sa mga hotel ug resorts tungod sa iyang natabang pinaagi sa pagpakigtambayayong sa pribadong sektor sud na sa daghang katuigan.

Si Magpale mao ang nangulo sa Provincial committee on tourism and international relations ug Suroy Suroy Tourism Commission.

“She gives a face to the excellent partnerships we have with hotels, resorts, consular offices, and tourism-related establishments. This page in the magazine is a high-value space,” nagkanayon si Costas.

Giangkon niya nga wa niya mapasabot kaayo kang Magpale ang layout decisions.

“I wasn’t able to fully explain the layout decisions to Vice Governor Magpale – my oversight,” dugang ni Costas.

Nangayo siyag pasaylo kang Magpale, kinsa iyang gihulagway nga katambayayong, tu­ngod sa “miscommunication” ug uban pang mga kakuwa­ngan ug maninguha nga di na kini masubli pa.

“If I had known the magazine’s format would cause trouble, I would have done the layout differently,” matod niya. (AZDL, REV)