Di tanan makabalik pagtinda

DI tanang mga manindahay karon sa merkado sa Tabunok ang makabalik sa ilang puwesto sa higayon nga mahuman na ang gitukod nga modernong merkado nga gikatakdang mahuman sunod buwan.

Ang Kagamhanan sa siyudad sa Talisay nagsugod na og has­has sa mga manindahay nga mao lay ma­kabalik sa pagpa­ninda.

Sunod buwan mahuman na ang ilang gitukod nga merkado sa Tabunok nga mokantidad og kapin P160 milyones.

Si Talisay City Administrator Atty. Rudelyn Navarro nipatawag og meeting sa mga opisyal sa city hall ug mga representante sa mga manindahay sa Tabunok kagahapon aron plantsahon ang ubang mga isyu alang na unya sa pag-ukopar sa merkado.

Atol sa tigom, gituki ang puwesto sa mga manindahay kon asa sila ipahimutang gikan sa isdaan, karnehan, mga utanon, prutasan, bugasan ug uban pa.

Gituki ang desinyo sa ilang mga displehanan ug gidak-on kon igo na ba kini o angay bang padak-on tungod kay apiki sa ilang mga baligya.

Matod ni Navarro nga ang gusto ni Mayor Eduardo Gullas nga tanang manindahay makabalik sa pagpaninda sa gitukod nga merkado.

Apan dali nga giklaro ni Na­varro nga sa pagkakaron a­­­dunay kapin sa 600 ka mga ma­­nindahay ang anaa sa ilang listahan, samtang dili tanan makabalik tungod kay aduna may di na ang orihinal nga tag-iya sa puwesto. (DRT)