HUMAN na gayud ang kalag-kalag. Kadtong nangadto sa minteryo nakaagi sa kalbaryo. Dili kalbaryo nga lugar kung dili ang hilabihang trapik sa kadalanan sa siyudad.
Bisan wala pa gani ang kalag-kalag daghan nang nagyawyaw sa kahuot sa atong trapiko. Kadtong napasmo sa grabeng trapik tungod sa pagdahili sa yuta sa Shrine hills sa diversion road makaingon nga "mao na ni ang pagbabago."
Nisamot ang trapik sa panahon sa kalag-kalag nga dili makaya bisan unsaon pag-ayo sa Traffic Management Center tungod sa kadaghan sa sakyanan ug sa kagamay sa dalan.
Nadugangan pa ang trapiko sa dalan nga giayo ug mga pasaway nga drayber nga bisan asa moagi basta makalusot lang.
Aduna koy higala nga Colonel sa Philippine Army nga natanggong di pa lang kaayo dugay og lima ka oras diha sa flyover sa Buhangin tungod sa baha. Wala yata moganar ang water pump sa lugar mao nga sa sakyanan sila nag-midnight snacks.
Tinuod nga nidaghan ang ihap sa tawo sa Davao ilabi na kadtong mga negusyante ug politiko nga gustong magpaduol sa lugar sa atong presidente.
Nakatabang sab sa pagpahumot sa atong siyudad sa mga "advisories" sa langyaw'ng nasud nga dili nila apilon ang Davao sa Mindanao nga likayan sa ilang mga residente.
Moingon sa ilang advisory nga gidid-an ang ilang katawhan nga mosuroy sa Marawi, Maguindanao ug Western Mindanao apan walay labot ang Davao.
Nibisita man gani si Japan Prime Minister Abe ug daghan pang mga ambassador sa lain-laing nasud dinhi. Apan bisan unsa ka malinawon ug ka-aligre sa atong siyudad, kitang tanan biktima gyud sa trapik.
Hapit na ta nahisama sa Cebu City nga mas maayo pa ang umang kay makaabot pa sa iyang bangag nga dili mapasmo.
Busa ang ilang lokal nga kagamhanan nagplano na'g butang ug Bus Rapid Transit (BRT) o "Tram System" diin anaay lugar nga bus ra gyud ang makaagi nga daw naay riles.
Giplanohan usab unta kini sa Davao kay maoy rekomendasyon sa World Bank apan subay sa akong nadunggog mas gusto ni Mayor Inday ang monorail system ug mga bag-ong de kuryente nga mini-bus ug jeep sa sulod samtang ang railway system sa gawas.
Karong Enero 2018 posibleng mogawas ang resulta sa transport system research nga gihimo sa Japan International Cooperation Agency (Jica).
Usa sa posibleng moguwa mao ang pinakamaayong mass transport system nga haum sa Davao ug kasikbit nga probinsiya sa rehiyon.
Kahibalo kita nga adunay giplano nga 102 ka kilometro nga Express Railway System gikan sa Digos hangtud sa Tagum nga gikahimuot nato apan magdepende gihapon sa resulta sa naasoy'ng Jica research.
Segun sa akong nasayran gikan sa usa sa mga consultants sa Jica nga posibleng ang mororail system ra sa Davao ang mahuman sulod sa termino ni PRody. Gawas nga dako ang magasto, daghan pang isyu nga sagubangon sa developer kung subayong ang naandang balaod nato.
Bisan gani si Public Highways Sec. Mark Villar nagbutyag nga ang isyu sa "right of way" maoy usa sa nakapadugay sa proyekto sa dalan.
Unta madayon kini aron maibsan na ang atong kalbaryo sa trapiko.