MABINI, Compostela Valley province - Usa ka retiradong kawani sa lokal nga kagamhanan ang giaresto sa kapulisan didto sa Purok Waling-waling, Mangga, Visayan Village, Tagum City, Davao del Norte alas 9 sa buntag, Biyernes, Nobyembre 3, 2017.

Ang dinakpan giila nga mao si Proserpina A. Huerta, 68, minyo, retiradong Municipal Treasurer sa Munisipalidad sa Mabini, nagpuyo sa Visayan Village, Tagum City.

Ang taho sa Mabini Municipal Police Station ngadto sa Compostela Valley Police Provincial Office nagkanayon nga si Police Senior Inspector Jesser I. Vagilidad IV ang nangulo sa Manhunt Charlie Operation batok sa suspek.

Gisilbi sa kapulisan ang orden de aresto nga gipaguwa ni Acting Presiding Judge Verginia D. Tehano-Ang sa Regional Trial Court, Branch 3, Nabunturan.

Kini subay sab sa kasong giatubang sa suspek nga Malversation of Public Funds ubos sa Criminal Case Number 9891-2015.

Mikabat sa P40 mil ang girekomenda nga piyansa sa korte bugti sa temporaryong kagawasan sa dinakpan.