DEAR Papa Joe,

Ako si Ronald, 37, taga Argao. Usa ko ka minyo ug upat na ang akong anak. Ang akong problema mahitungod sa akong asawa nga nagpakaaron ingnon nga limpyo.

Nagsugod kini, Papa Joe, dihang siya magsigi og pamantay sa iyang kauban nga sekretarya sa ilang amo nga kabit kuno. Ako lang siyang paminawon basin og bunga lang sa di patas nga pagtagad sulod sa iyang gitrabahuan. Hangtod na lang magduha na ka tuig, kini siya sige na og panabi nako nga luoy kaayo ang bana nga seaman sa ilang sekretarya kay lagi kabit sa iyang amo. Iya kong gipakita sa cell phone sa iyang amo ug ako pa mismo ang nakakuha sa mga sent messages kay high tech ang phone.

Karon akong nahibudngan nganong siya ang magdaladala sa phone sa iyang amo. Karon kay niabot ang bana sa sekretarya ug nagkagrabe ang iyang kalagot sa iyang boss kay gigastuhan kuno pag-ayo ang iyang kauban. So niingon ko nga ako na lay tug-an sa imong amo sa management para maimbestigahan karon kay di man siya musugot kay daghan kuno maangin.

Karon akong nasayran nga giiring-iringan sab siya sa iyang amo. Nagmata lang ko og buntag. Ako ni nabantayan dihang ako na mismo ang makabasa sa mga text sa iyang amo nga naay unod ug pag check nako sa call log, daghang tawag sa dis oras na unya di lang ko kabantay kay gi silent diay niya.

Di ta nako tuohan ang istorya sa among silingan nga nakaila niya sa una nga hilig niya mosakay sa iyang amo. Unya kay mobiyahe man siya, daghan sad siyag mga texter nga magtawag niyag pangga unya ingon ko niya nga wrong send ra daw. Unsa may angay buhaton nako? Tambagi ko.

RONALD

Ronald,

Ang ako lang masulti kay istoryahi imong asawa unsay tinud-anay nga nabuhat man niya kini nga siya pa may mamantay siya sad nagbuhat. Mao bitaw nay giingon nga una ka manilhig sa nataran sa ubang tawo silhigi sa ang imo. Tan-awa ang imong kaugalingon kon wa ba sad kay pagkuwang nganong nabuhat na niya nimo.

Wa man sab nimo gisugid unsa ang imong trabaho. Kon sakto ka sa imong pagduda, panid-i ang imong asawa ug kon desidido ka pasakahi dayon og kiha kon naa kay ebidensya. Di maayo ang iyang gibuhat, but for the sake sa inyong mga anak, lihuka sa ang pagsabotsabot para ma correct nimo ang iyang binuhatan.

Ingna siya nga kon mahimo undang lang sa og trabaho para matul-id ninyo ang inyong mga kasaypanan kay sa gikaingon ko na, basin duna sad kay pagkuwang. Ang luoy man gud kay ang inyong mga anak nga mag dako nga apektado sa sitwasyon.

Busa hunahunaa asa may a­­­ngay buhaton nga magdako i­­­mong anak sa immoral nga en­­­viron­­­­ment o normal. Naa ra na nimo.

PAPA JOE

(Sa inyong tampo

ipadala lang sa papajoe­superb@gmail.com)