DEAR Heartline,

Usa ko sa tagasubaybay ninyo. Tawaga lang ko sa ngalan nga Taurus taga Davao, 31, naay kakulian sa lawas. Usa ko ka PWD. Ang akong problema bahin sa akong textmate nag-edad og 43, naa pud siyay kakulian sa lawas pero nagtrabaho sa Tagum. Kadugayan nagka-uyab mi.

Ang problema sige siya og saad nga tabangan ko niya para daw naa koy negusyo. Dili ko ganahan kay sige og paasa. Bulag siya sa iyang kaipon unya moadto daw siya diri para magkita mi then magpakasal daw mi pero hangtud karon wala man natuman iyang mga saad.

Angay pa ba ko maglaum sa iyang mga saad nako?

Taurus

***

Hi Taurus,

Sayon ra kaayo ang pagsaad, apan lisud kaayo ang pag-commit o paghimo niini.

Okay ra tong mosaad kausa, kaduha di matuman, pero kung ulit-ulit na lang, then ang rason, balik-balik ra pud, then, pag-reflect na.

Pero, mas maayo sab nga imoha pud nga hinuklugan kung nganong di sab gyud niya mahimo-himo ang iyang saad nimo.

Sama anang makigkita siya nimo aron personal mong magkahimamat. Sa imo ng gisulti, PWD sya, basin sab pud og lisud sab sa iyang kabahin nga magbiyahe-biyahe.

Kung sa paminaw nimo puros na lang gyud saad ang anaa sa inyong relasyon, way effort, as in way lihuk, then ayaw na lang gyud og laum perme.

Paningkamot na lang og imoha diha nga makabaton kag gamay'ng negusyo. Usa pa, di sab gyud nimo siya mapugos nga tabangan gyud ka, though uyab mo, pero di kana igong rason alang niana.

Heartline