ANG Iskolar Ni Juan (INJ), nga proyekto sa Gokongwei Brothers Foundation, nag-anunsyo sa pagdawat og mga applications alang sa 50 slots sa scholarships labi na sa kabatan-onang taga Davao City nga dunay maayong tinguha nga mo-eskuwela apan wa kini katunghaan gumikan sa kalisod sa pagpuyo.

Usa ka fully-subsidized one year Technical-Vocational Education and Training Scholarship Program ang ihanyag sa INJ alang sa mga malampusong makuha sa maong scholarship.

Ang mga interesado nga mga beneficiaries mamahimong mopasar una sa ipahigayong examination karong ala una sa hapon karong adlawa (Nobyembre 6) didto sa City Library, Sangguniang Panglungsod Building.

Ang mograduwar niini nga programa makahigayon sa pagkuha og trabaho sa mga opisina sa Universal Robina Corp ug bisan sa mga factories niini.

Ubos sa INJ, ang GBF kauban ang JG Summit Inc., nagbutyag nga kinahanglan ang mga aplikante usa ka ulitawo, o dalaga, Filipino nga nag-edad gikan 17-25 anyos kinsa kinahanglan nga migraduwar sa high school, ma-public school man kini o di kaha Alternative Learning System (ALS).

Kinahanglan sab ang usa ka aplikante dunay maayong record sa tunghaan nga gigikanan, ug maayong grado diin dunay income ang pamilya nga di motaas sa P200,000 ang tuig.

Sa pag-adto sa aplikante karong adlawa sa Davao City Library Office kinahanglan ang Application Form dunay 2x2 photo; duna say nakalain nga usa ka pahina 'essay' diin ang topiko mao ang, "Why do I deserve to be a Gokongwei Brothers Foundation Scholar?’; ug dunay Transcript of Records sa gigikanan nga tunghaan. (JPC/With PR)