SIKOP ang usa ka Grade 12 student human makuhaan og pinaugang dahon sa marijuana sud sa iyang pitaka atol sa checkpoint.

Ang insidente nahitabo alas 10:30 sa gabii niadtong Sabado didto sa Bacaca Road, Barangay 19-B Poblacion, dakbayan sa Davao.

Usa ka Angelo Reyes Rapuza, 18, nagpuyo sa Awhag Subdivision, Barangay 19-B, ang nasikop sa kapulisan sa San Pedro Police Station.

Nasayran nga dihang nagpahigayon og checkpoint ang kapulisan sa San Pedro, nakapkapan sa mga pulis nga nagburot ang bulsa sa suspek hinungdan nga gipakuha kini.

Dihang gikuha na sa suspek, gipaablihan sa pulis ang pitaka niini ug didto nadiskubrehan ang usa ka pakite sa pinaugang dahon sa marijuana.

Gikumpiska sab ang motorsiklo nga gimaneho sa suspek kinsa gitakdang pasakaan og kasong pagsupak sa Republic Act 9165 kun Comprehensive Dangerous Drugs Act of 2002 didto sa korte.